ფეხბურთი

8:13 | 17.04.2015 | ნანახია [] - ჯერ

“ნაპოლი” ნახევარფინალშია

იტალიურმა “ნაპოლიმ” ჩემპიონთა ლიგაზე დაწყებული გერმანული კლუბების შავი დღე ევროპის ლიგაზე გააგრძელა და ტურნირს შემორჩენილი ამ ქვეყნის ერთადერთი წარმომადგენელი სტუმრად მართლაც შავ დღეში ჩააგდო.

“ვოლფსბურგ არენაზე” 4:1 მოგების შემდეგ, ნეაპოლელებს ცალი ფეხი ნახევარფინალში აქვთ. 16 აპრილს გუნდის მთავარ მწვრთნელ რაფაელ ბენიტესს 55 წელი შეუსრულდა და შეგირდებმა მას იუბილე ღირსეულად მიულოცეს. არადა, საკუთარ მოედანზე “ვოლფსბურგი” ფავორიტი იყო და პირველ წუთზე გერმანელებმა სტუმრები საკუთარ ნახევარზე გამოკეტეს, მაგრამ მე-15 წუთზე გოლი თავად გაუშვეს. შეტევა მარეკ ჰამშიკმა წამოიწყო, ის დრის მარტინსმა გააგრძელა და მცველებს ზურგს უკან გონსალო იგუაინს მოძრაობაში უპასა. არგენტინელმა ბურთი მკერდზე ტექნიკურად მიიღო და მეორე შეხებით კარში გადაგზავნა, რითაც თავის შვიდმატჩიან მშრალ სერიას წერტილი დაუსვა.

სულ რაღაც 8 წუთში იგუაინმა ასისტენტის როლი მოირგო, საჯარიმოში უმეთვალყურეოდ მიტოვებული ჰამშიკი მოძებნა და მანაც ანგარიში უპრობლემოდ გააორა. მეორე ტაიმი ახალი დაწყებული იყო, როდესაც იგუაინი მეკარესთან პირისპირ აღმოჩნდა, მაგრამ შანსი ხელიდან გაუშვა. დუბლი ჰამშიკმა შეასრულა, როდესაც გერმანელი მცველები შეცდნენ - 0:3. 77-ე წუთზე შეცვლაზე შესულმა გაბიადინიმ ანგარიში კატასტროფული გახადა და მართალია მასპინძლებმა ერთი ბურთი მალევე გაქვითეს, მაგრამ ეს ამ წყვილს შორის გამარჯვებულზე ალბათ ვეღარანაირ გავლენას ვერ მოახდენს.

მეორე გუნდი, რომელმაც გამარჯვება მოიპოვა, თასის მოქმედი მფლობელი ესპანური “სევილიაა”, მაგრამ მან დისკვალიფიკაციებით დამძიმებულ “ზენიტს” დიდი გაჭირვებით აჯობა და განმეორებით მატჩში დიდი ბრძოლის გადატანა მოუწევს. ანდალუზიელებს გამარჯვება შეცვლაზე შესულმა ფეხბურთელებმა მოუტანეს. სანქტ პეტერბურგელები დაცვიდან თამაშობდნენ და ბედს კონტრშეტევებზე ეძებდნენ. ესპანელები ჯგუფურად შეცდნენ, სერხიო რიკომ რიაზანცევის დარტყმული ცუდად მოიგერია და მანაც განმეორებითი დარტყმით ანგარიში გახსნა.

“სევილიამ” ცვლილებებს მიმართა, მაგრამ დიდი ხნის განმავლობაში ამან შედეგი ვერ გამოიღო. 64-ე წუთზე თამაშში ბაკა ჩაერთო და მას ანგარიშის გასათანაბრებლად 10 წუთზე ნაკლები დაჭირდა - ვიდალის მიერ ჩაწოდებულ ბურთს მან თავი შეაგება. 88-ე წუთზე “სევილიამ” სტუმრებს გამარჯვება გამოგლიჯა: სუარესმა ეფექტური დარტყმით მასპინძლებს 2:1 მოაგებინა.

უკრაინულმა კლუბებმა ფრედ ითამაშეს და ეს “დნეპრისთვის” წარმატებად უნდა ჩაითვალოს. “ბრიუგე” ევროპის ლიგაზე ერთადერთ დაუმარცხებელ გუნდად რჩება, მაგრამ საკუთარ მოედანზე მატჩის 0:0 დასრულება მათ ნახევარფინალში გასვლას კითხვის ნიშნის ქვეშ აყენებს. წვიმიან ამინდში გუნდები შორეული დარტყმების იმედად იყვნენ, მომენტებიც იყო, მაგრამ მათი რეალიზება ვერავინ მოახერხა და ჯაბა კანკავას გუნდს, რომელმაც მთელი 90 წუთი ითამაშა, ნახევარფინალში გასვლის კარგი შანსი აქვს. განმეორებითი შეხვედრა 23 აპრილს კიევის “ოლიმპიურზე” გაიმართება.

კიევის “დინამო” გამარჯვებასთან ძალიან ახლოს იყო, მაგრამ მსაჯის მიერ დამატებულ წუთებზე შეცვლაზე შესული ბაბაკარისგან გოლი გაუშვა. თავიდან ორივე გუნდი ფრთხილობდა და მეტოქის შეცდომას ელოდა. 36-ე წუთზე მოულოდნელი გოლი გავიდა და მასპინძლები დაწინაურდნენ – ლენსმა საჯარიმოს გარედან გაისროლა, ნენად ტომოვიჩს დაფარება სურდა, მაგრამ ბურთი უცნაური ტრაექტორიით ნეტოს კარის ბადეში ჩაეშვა. მეორე ტაიმში “ფიორენტინამ” სისწრაფეს უმატა და მომენტებიც შექმნა. 77-ე წუთზე ბორხა ვალეროს დარტყმული ძელმა აისხლიტა და თითქოს “დინამოს” მნიმალური უპირატესობა შერჩა, მაგრამ მსაჯის მიერ დამატებულ წუთებზე ბაბაკარის ეფექტური დარტყმა გოლით დასრულდა - 1:1.

ევროპის ლიგის 1/4-ფინალი. პირველი მატჩები

16 აპრილი.

სევილია (ესპანეთი) - ზენიტი (რუსეთი) 2:1 (0:1)

გოლები: 0:1 რიაზანცევი (29), 1:1 ბაკა (73), 2:1 სუარესი (88)

გაფრთხილება: სუარესი (76) - ხავი გარსია (68), გარაი (81), რიაზანცევი (82)

ბრიუგე (ბელგია) - დნეპრი (უკრაინა) 0:0

გაფრთხილება: ვორმერი (60), დე ბოკი (61) - ფედორჩუკი (35), ლეო მატოსი (56), ჩებერიაჩკო (57)

დინამო (კიევი, უკრაინა) - ფიორენტინა (იტალია) 1:1 (1:0)

გოლები: 1:0 ლენსი (36), 1:1 ბაბაკარი (90+2)

გაფრთხილება: დრაგოვიჩი (44), სიდორჩუკი (65), ხაჩერიდი (69), ლენსი (72) - გომესი (45+2), ალონსო (66), ხოაკინი (67), ტომოვიჩი 90+4)

ვოლფსბურგი (გერმანია) - ნაპოლი (იტალია) 1:4 (0:2)

გოლები: 0:1 იგუაინი (15), 0:2 ჰამშიკი (23), 0:3 ჰამშიკი (64), 0:4 გაბიადინი (77), 1:4 ბენტნერი (80)

გაფრთხილება: ბენტნერი (80)

0.144701