სამშაბათს დავით ყიფიანის სახელობის საქართველოს თასის გათამაშების პირველი ნახევარფინალური მატჩები გაიმართება. ივანწმინდაში “ჩიხურა” “სამტრედიას” უმასპინძლებს, ერთი საათით გვიან კი “დინამო არენაზე” თბილისის “დინამო” “ცხინვალს” დაუხვდება.

საინტერესოა, რომ ნახევარფინალის მონაწილეთაგან, ისტორიის განმავლობაში თასი მხოლოდ დინამოელებს აღუმართავთ. დინამო თასის 11-გზის მფლობელია. თბილისელთა გამარჯვებით დამთავრდა ბოლო ორი გათამაშებაც. შარშანწინ ჩეხი დუშან უჰრინ უმცროსის, შარშან კი მალხაზ ჟვანიას თავკაცობით. ორივე ფინალში დინამოელთა მეტოქე სოსო ფრუიძის გაწვრთნილი ”ჩიხურა” იყო.

ნახევარფინალში “დინამოს” ”ცხინვალთან” ადრეც უთამაშია, 2009-10 წლების გათამაშებაში. მაშინ პირველი მატჩი გორის ქართლის სტადიონზე 0:0 დამთავრდა, საპასუხო შეხვედრაში კი დინამოელებმა თენგიზ ჩიკვილაძის გოლითა და მათე ვაწაძის დუბლით 3:0 იმარჯვეს, ფინალში გავიდნენ და იქ შემდეგ “ვიტ ჯორჯიასთან” დამარცხდნენ.

დინამოელებმა ეროვნული ჩემპიონატის ბოლო ორი მატჩი ფრედ დაამთავრეს. ამისდაკვალად, ლიდერობა ჯერ ბათუმის “დინამოს” დაუთმეს, მაგრამ, შემდეგ მაინც დაიბრუნეს. ისევ ერთპიროვნული ლიდერები არიან. ცხინვალელბმა კი, რომლებსაც ასევე აქვთ ამ ზაფხულს ევროთასებზე გასვლის ამბიცია, ბოლო 3 თამაში წააგეს, ლიდერებს გვარიანად ჩამორჩნენ და ახლა, ალბათ, ევროსაგზურს თასზე წარმატებული გამოსვლით თუ მოიპოვებენ. ამიტომ, არაფერს დათმობენ და სავარაუდოდ “დინამოს” დიდ ბრძოლას გაუმართავენ.

ცხინვალელთა მსგავსად ევროპაში გასვლა სამტრედიელებს და საჩხერელებსაც სურთYდა თუ სატურნირო ცხრილს გადავხედავთ, ამის საუკეთესო საშუალებად ამათთვისაც თასზე კარგად თამაში რჩება, ამიტომ მართლაც საინტერესო მატჩებია მოსალოდნელი. “ჩიხურა” ზედიზედ მესამედ გავიდა ნახევარფინალში. სოსო ფრუიძემ უკვე იცის როგორ უნდა ფინალში გაღწევა. სამტრედიელებს ამ მხრივ ნაკლები გამოცდილება აქვთ, თუმცა სათასო შეხვედრებს თავისი სპეციფიკა გაააჩნია, ამიტომ წინასწარ არაფრის თქმა შეიძლება.

“დინამო”- “ცხინვალის” პირდაპირ ტელერეპორტაჟს საზოგადოებრივი მაუწყებლის მეორე არხი შემოგვთავაზებს.

ჩიხურა (საჩხერე) – სამტრედია

ივანწმინდა. ცენტრალური. 16:00

დისკვალიფიცირებულები: დავით ბოლქვაძე, გიგა ბეჭვაია (ორივე სამტრედია)

მსაჯები: ა. ნონიკაშვილი, ზ. მენთეშაშვილი, ზ. ფიფია, გ. კიკაჩეიშვილი, ი. კვირიკაშვილი, ლ. კვარაცხელია (სათადარიგო)

წლევანდელ გათამაშებაში:

ჩიხურა. მერვედფინალი: ზესტაფონი 0:0, 1:0. მეოთხედფინალი: მეტალურგი 0:0, 3:0.

სამტრედია. მეთექვსმეტედფინალი: ბეთლემი 3:0, 4:1. მერვედფინალი: დინამო (ბათუმი) 1:4, 3:0. მეოთხედფინალი: ტორპედო 2:1, 0:0.

დინამო (თბილისი) – ცხინვალი

თბილისი.”დინამო არენა.” 17:00

დისკვალიფიცირებულები: ლაშა თოთაძე, სტეფან ბუკორაცი (ორივე დინამო); დავით იმედაშვილი, ნიკა კაჭარავა (ორივე ცხინვალი)

მსაჯები: დ. ხარიტონაშვილი, ბ. ჭიჭინაძე, ლ. თოდრია, ჯ. ხორავა, ა. ბასლეჰლო, გ. ავაზაშვილი (სათადარიგო)

წლევანდელ გათამაშებაში:

დინამო. მერვედფინალი: შუქურა 1:1, 3:1. მეოთხედფინალი: დილა 0:0,1:0

ცხინვალი. მეთექვსმეტდფინალი: საბურთალო 1:2, 3:0. მერვედფინალი: საპოვნელა: 3:0, 0:0. მეოთხედფინალი: ვიტ ჯორჯია 4:5, 4:1