მადრიდის “რეალი” 2015-2016 წლების სეზონისთვის გაძლიერებას უკვე შეუდგა. “სამეფო კლუბმა” პორტუგალიური “პორტუდან” 23 წლის ბრაზილიელი მცველი დანილო ოფიციალურად დაიმატა. ამის შესახებ ესპანური გრანდის ვებ-გვერდი იუწყება. “რეალი” დრაკონებს სამხრეთამერიკელი განაპირა მცველის სანაცვლოდ 31 მილიონ ევროს გადაურიცხავს.

“რეალ მადრიდმა” და “პორტუმ” მიაღწიეს შეთანხმებას დანილოს მადრიდში გადმოსვლასთან დაკავშირებით. ბრაზილიელი “რეალის” ღირსებას მომავალი სეზონიდან დაიცავს. კონტრაქტი კი 2021 წლის 30 ივნისამდე იქნება ძალაში”.

ფეხბურთელის ტრანსფერი თავის მხრივ პორტუგალიურმა გუნდმაც დაადასტურა.

“”პორტუ” და “რეალი” შეთანხმდნენ, რომ დანილო “სამეფო კლუბში” 31.5 მილიონი ევროს სანაცვლოდ გადაბარგდება”, - ნათქვამია დრაკონების” საიტზე.

დანილო “პორტუს” შემადგენლობაში 2011 წლიდან მოყოლებული ასპარეზობს. მიმდინარე სეზონში მან პორტუგალიის ჩემპიონატში ჩატარებულ 23 მატჩში 3 გოლის გატანა შეძლო.