სიცილიური “პალერმოს” პრეზიდენტი მაურიციო ძამპარინი დარწმუნებულია, რომ მისი გუნდის ლიდერი პაულო დიბალა სხვა კლუბს უახლოეს ზაფხულში მიაშურებს.

“ნათელია, რომ პაულო “პალერმოს” დატოვებს. ამჟამად ახალი თავდამსხმელის ძებნით ვართ დაკავებულნი.

არ ვიცი, დიბალა იტალიაში დარჩება, თუ კარიერას საზღვარგარეთ განაგრძობს. შანსები 50-50-ზე არის.

აღდგომის შემდეგ ფეხბურთელის აგენტს შევხვდები, რომელიც ბრწყინვალედ მუშაობს იმისათვის, რომ დიბალას კარგი მომავალი ჰქონდეს.

“იუვენტუსის” სპორტულ დირექტორთან, ჯუზეპე მაროტასთან კავშირს ვინარჩუნებ. ვიცი, რომ ტურინელები დიბალას შეძენით დაინტერესებულნი არიან, მაგრამ პაულოს მსურველი კიდევ არაერთი კლუბია.” – განაცხადა ძამპარინიმ.

პაულო დიბალა “პალერმოში” 2012 წლიდან თამაშობს. სერია A-ს მიმდინარე გათამაშებაში მან 27 მატჩი ჩაატარა, 12 გოლი გაიტანა და 7 შედეგიანი გადაცემა გააკეთა.