დღეს, ტელეკომპანია “ტვ-სპორტის” საინფორმაციო გადაცემაში გავიდა სიუჟეტი, რომელიც საფეხბურთო კლუბ “ზესტაფონს” ეხებოდა. იმერულ გუნდს მწვავე ფინანსური კრიზისი უდგას და დიდი შანსია, რომ გუნდმა საქართველოს ჩემპიონატის უმაღლეს ლიგაში ასპარეზობა ვეღარ გააგრძელოს. აღნიშნულ ტელეკომპანიასთან საუბარში ზესტაფონელთა გენერალურმა დირექტორმა მიხეილ ხუციშვილმა განაცხადა, რომ ზესტაფონის მუნიციპილატეტიდან დახმარების მიღება გაურკვეველი მიზეზების გამო გაიწელა.
“თანხა არაა. ველოდებით ზესტაფონის გამგეობიდან 200 ათასი ლარის ჩარიცხვას, რაც რატომღაც არ ხდება. იურიდიული საკითხები იყო მოსაგვარებელი, მაგრამ უკვე დიდი ხანია, რაც თანხის ჩარიცხვა გაიწელა”, - ამბობს ხუციშვილი.
თავის მხრივ ზესტაფონის გამგებელი ტარიელ თუთარაშვილი “ტვ-სპორტთან” საუბარში აღნიშნავს, რომ თანხის ჩარიხვა ხელოვნურად არ გაწელილა და ამას ობიექტური მიზეზები ჰქონდა.
“თუ თანხის ჩარიცხვა გაიწელა, ე.ი. ამას ობიექტური მიზეზები ჰქონდა. ამჯერად მიმდინარეობს დეტალების დაზუსტება”, - განაცხადა თუთარაშვილმა.
ზესტაფონის მუნიციპალიტეტი საფეხბურთო კლუბ “ზესტაფონს” ჯერ კიდევ იანვრის თვეში უნდა დახმარებოდა, თუმცა მას შემდეგ, როგორც ჩანს, ქმედითი ნაბიჯები არ გადადგმულა.
“ზესტაფონი” რუსთავის “მეტალურგის” შემდეგ საქართველოს 16 გუნდიან ჩემპიონატში მეორე გუნდია, რომელსაც ღრმა ფინანსური პრობლემები აქვს და ჩემპიონატში ვერმონაწილეობის საფრთხის წინაშე დგას.
