იტალიური ფეხბურთის გრანდ “მილანს” სახარბიელო ერა რომ არ უდგას არახალი ამბავია. მიმდინარე სეზონს “როსონერი” ძალზე მძიმედ ატარებს და თავის ისტორიაში ანტირეკორდებს ამყარებს.

გასული წლის 19 ოქტომბერს, როდესაც ფილიპო ინძაგის გუნდმა “ვერონა” სტუმრად 3:1 დაამარცხა, შავ-წითლები მეოთხე ადგილზე აღზევდნენ და ლიდერ “იუვენტუსს” მხოლოდ 5 ქულით ჩამორჩებოდნენ. მაშინ, მრავლისმნახველი მილანელი ქომაგები იმედოვნებდნენ, რომ თავიანთი საყვარელი გუნდი ჩემპიონთა ლიგის საგზურს მოიპოვებდა, მაგრამ...

მას მერე, 18 ტურმა განვლო “მილანმა” კი ამ მატჩებში მხოლოდ 20 ქულა მოიპოვა. 19 გატანილი გოლის საპირისპიროდ 20 გაუშვა.

დღეისათვის ინძაგის შეგირდებს 35 გოლი აქვთ გატანილი. 25 ტურის შემდეგ, ამაზე უარესი შედეგი “როსონერის” 2006-2007 წლების სეზონის შემდეგ არ ჰქონია (33 გოლი).

მას შემდეგ, რაც “მილანს” სილვიო ბერლუსკონი ხელმძღვანელობს, გუნდის ყველაზე ცუდი შედეგი სერია A-ში დაკავებული ადგილის მიხედვით 1996-1997 წლების სეზონში დაფიქსირდა, როცა არიგო საკის გუნდი მე-11 პოზიციაზე გავიდა, ხოლო ერთი წლის შემდეგ, ფაბიო კაპელოს თავკაცობით ლომბარდიელებმა მე-10 ადგილი ირგუნეს.

არავინ იცის, როგორ წარიმართება დარჩენილი 13 ტური და რომელ ანტირეკორდს წაეთამაშება ფილიპო ინძაგის გუნდი...