გასულ წელს როჯერ ფედერერმა საწადელი აიხდინა, შვეიცარიის ნაკრების შემადგენლობაში დევისის თასი მოიგო, წლეულს კი ამ ტურნირში მონაწილეობის მიღებას არ აპირებს. ამის თაობაზე როჯერმა Associated Press-ს განუცხადა.
“გადაწყვეტილების მიღება იოლი საქმე არ ყოფილა. დევისის თასის მოპოვების შემდეგ ყველაფერი კარგად ავწონე. გამოვტყდები, ნაკრებში თამაში ყოველთვის დამატებით სირთულეს მიქმნიდა. ისეც ხდებოდა, ეროვნული გუნდის წარუმატებლობაში ფედერაცია მადანაშაულებდა. მოხარული ვარ, რომ ამ მითქმა-მოთქმას საბოლოოდ დავუსვი წერტილი. ნაკრებში უფრო პარტნიორების ხათრით ვთამაშობდი. ძალიან მინდოდა, ბიჭებს ტიტული მოეხვეჭათ. იმედია, ვავრინკა დევისის თასზე გამოვა და მსოფლიო ჯგუფში ადგილს შევინარჩუნებთ. ისე კი, პირველ წრეში ბელგიელთა წინააღმდეგ თამაშისას აუტსაიდერებად გამოვიყურებით”, - განაცხადა ფედერერმა.
