ცნობილმა საფეხბურთო აგენტმა მინო რაიოლამ ესპანურ გამოცემა “მარკას” განუცხადა, რომ საფრანგეთის ეროვნული ნაკრების და ტურინის “იუვენტუსის” ნახევარმცველის პოლ პოგბას გადაბირება 7 ევროპულ გრანდს სურს.

“რამდენი ღირს პოგბა? 100 მილიონზე მეტი, მაგრამ ფასს ფეხბურთელს ის კლუბი დაადებს, რომელიც მას შეიძენს. პოგბას სახით კლუბი ახალი თაობის ლიდერს შეიძენს. შვიდ გუნდს სურს ფრანგის საკუთარი რიგებში ხილვა, მათ შორის “ბარსელონაცაა”. ყველასთან მაქვს კონტაქტი, ყველაზე ნაკლებად კი – “რეალთან”.” – განაცხადა რაიოლამ.

2014 წლის მუნდიალის საუკეთესო ახალგაზრდა ფეხბურთელის ფასი ნელ-ნელა იწევს. ამჟამად 21 წლის პოგბას სატრანსფერო ღირებულება 50 მილიონ ევროს შეადგენს. გასული წლის დასაწყისში ფრანგის შეძენა 34 მილიონად შეიძლებოდა.

მიმდინარე სეზონში ნახევარმცველმა “ბიანკონერის” მაისურით ყველა ტურნირზე 30 მატჩი ჩაატარა, გაიტანა 8 გოლი და 5 საგოლე გადაცემაც შეასრულა.