საქართველოს მეორე ლიგის კლუბ ხონის “იმერეთში” იმუშავებს 53 წლის სპეციალისტი კობა ჟორჟიკაშვილი. “მეტალურგის,” “ზესტაფონის,” საქართველოს 17-წლამდე ნაკრებისა და ბათუმის “დინამოს” ყოფილი მწვრთნელი ბოლო დროს საფეხბურთო საქმიანობას ჩამოშორებული იყო.

როგორც ხონის “იმერეთის” პრეზიდენტმა გუგა ხვიჩიამ “მსოფლიო სპორტთან” საუბარში აღნიშნა, კობა ჟორჟიკაშვილი როგორც ბავშვთა გუნდების ასევე ძირითადი გუნდის მწვრთნელთა კონსულტანტად იმუშავებს.

ხონის “იმერეთმა” ზამთრის მოსამზადებელი ეტაპის დროს რამდენიმე ცნობილი ფეხბურთელი დაიმატა. მათ შორის საქართველოს 19-წლამდე ნაკრების ყოფილი ფეხბურთელი გიორგი ხუმარაშვილი, “ვიტ ჯორჯიასა” და “სამტრედიას” ყოფილი ფეხბურთელი გიორგი მელქაძე, რუსთავის “მეტალურგთან” ერთად საქართველოს 2009-2010 წლების სეზონის გამარჯვებული გელა ხუბუა, “ზესტაფონის” ყოფილი შემტევი ნიკოლოზ ჩიხლაძე. კლუბს ასევე შეუერთდა ილია პავლიაშვილი, რომელმაც მიმდინარე სეზონის პირველი ეტაპი “სამტრედიაში” გაატარა. პავლიაშვილის მსგავსად "იმერეთში" გააგრძელებს კარიერას "სამტრედიას" ყოფილი მცველი ბიჭიკო გედენიძე.

შეგახსენებთ, ხონის “იმერეთი” საქართველოს მეორე ლიგის დასავლეთ ზონას 37 ქულით ლიდერობს. მას ერთი ქულით ჩამორჩება “სამეგრელო,” ხოლო მესამე ადგილს ვანის “სულორი” იკავებს.