საფეხბურთო მატჩების “ჩაწყობაში” ბრალდებულ მსაჯთა სასამართლო პროცესი გაიმართა. სასამართლოს გადაწყვეტილებით, ყველა ბრალდებულს საპროცესო შეთანხმება გაუფორმდა.

სასამართლოს გადაწყვეტილებით დაკავებული რვა მსაჯიდან ხუთ მათგანს დაკავებიდან 9 თვის განმავლობაში სასჯელაღსრულების საკანში ყოფნა მოუწევს. ესენი არიან: ზვიად ასკაროღლი, ალექსანდრე გუნთაძე, თეიმურაზ ხუჭუა, თორნიკე გვანცელაძე, ირაკლი ურუშაძე. მათ ასევე 3 000 ლარის გადახდა დაეკისრათ.

რაც შეეხება ონისე მოლოდინაშვილს, ოთარ ხეცაძესა და მამუკა ურუშაძეს:

ონისე მოლოდინაშვილს წლითა და 2 თვით მიესაჯა პატიმრობა, მას 2000 ლარიანი ჯარიმა დაეკისრა, ხოლო პროფესიას 2 წლით ჩამოშორდება.

ოთარ ხეცაძესა და მამუკა ურუშაძეს ერთწლიანი სასჯელი შეეფარდათ, ამასთან ხეცაძეს 15 000 ლარის, ხოლო ურუშაძეს 10 000 ლარის გადახდა დაეკისრა.

“სასამართლომ განიხილა ბრალდების მხარის შუამდგომლობა ბრალდებულებთან საპროცესო შეთანხმების გაფორმების თაობაზე, სასამართლომ შეისწავლა საპროცესო შეთანხმების დამტკიცების თაობაზე შუამდგომლობის შინაარსი, მისი სასჯელის სამართლიანობა, შეადარა საქმეში არსებულ მტკიცებულებებს, მიიჩნია სამართლიანად ეს ყოველივე და დაამტკიცა საპროცესო შეთანხმების ოქმები” – განაცხადა ზვიად ფხაკაძემ “მოამბესთან” საუბარში.

შეგახსენებთ, მსაჯთა დაკავება გასული წლის 24 სექტემბერს შინაგან საქმეთა სამინისტროს ანტიკორუფციული სამსახურის თანამშრომლების მიერ მოხდა.

გამოძიებამ დაადგინა, რომ დაკავებული მსაჯები 2500-დან 5000-მდე ამერიკული დოლარის სანაცვლოდ წინასწარ ურიგდებოდნენ მოქალაქეებს მათი მსაჯობით ჩასატარებელ მატჩებზე ყვითელი და წითელი ბარათების რაოდენობაზე, რასაც ასრულებდნენ კიდეც.