თურქეთში შეკრებაზე მყოფმა ფოთის “კოლხეთმა” ყირგიზეთის ჩემპიონი “დორდოი” და ყაზახური გუნდი “ირტიში” რომ დაამარცხა, ამის შესახებ უკვე იცის გულშემატკივარმა. დღეს ზღვისპირელებმა ლიბიის პირველობის ჩემპიონ და ლიდერ გუნდთან “ალ აჰლისთან” გამართეს შეხვედრა და დამსახურებულად 1-0 გაიმარჯვეს.

მატჩში ზაზა ინაშვილის გუნდის ტერიტორიული უპირატესობა აშკარა იყო და ფოთელებმა საგოლე მომენტებიც ბლომად შექმნეს. პირველ ნახევარში გიგა ამბროლაძეს ორჯერ შეეძლო საკუთარი გუნდის დაწინაურება. ჯერ მისი თავური დარტყმა აღმოჩნდა არაზუსტი, მეორე ეპიზოდში კი მეკარესთან პირისპირ გასულმა ფოთელმა შემტევმა შანსი ვერ გამოიყენა.

ერთ-ერთ ეპიზოდში სტუმრებსაც შეეძლოთ ხიფათის შექმნა, თუმცა მეკარე სეფიაშვილი უშეცდომო იყო, ლიბიელთა კარის მიმართულებით ჯიქიას მიერ შესრულებული საჯარიმო დარტყმის დროს კი მოწინააღმდეგე გუნდის კარის დარაჯმა ითამაშა ასევე დამაჯერებლად.

მეორე ნახევარში ფოთელებმა შეტევა კიდევ უფრო გააძლიერეს და ამან შედეგიც გამოიღო, ჯერ ჟიშკარიანის სახიფათო დარტყმას გადაურჩნენ ლიბიელები, თუმცა მატჩის 80-ე წუთზე იმავე ჟიშკარიანის მიერ წამოწყებული შეტევის შედეგად ნიკა სიჭინავამ მიიღო ბურთი და მეტოქეს კარში გზავნიდა, კიპერმა ბურთი უკუაგდო, მაგრამ დასწრებაზე ყველას ალეკო ქორჩილავამ აჯობა და “კოლხეთი” დააწინაურა 1-0.

თემურ ბარქაია: (“კოლხეთის” გენერალური დირექტორი) “დღევანდელი თამაშით კმაყოფილი ვართ - გუნდმა შედეგთან ერთად ხარისხიანი თამაშიც ანახა. რაც შეეხება პირველ შეხვედრას ბულგარელებთან, “კოლხეთმა” ის მატჩი ყოველგვარი ადაპტაციის გარეშე ჩაატარა. უცხოური გუნდების უმრავლესობა თურქეთში ერთჯერადი შეკრებით არ კმაყოფილდებიან და ზამთრის პერიოდში 2-3 ჯერ ჩამოდიან ხმელთაშუაზღვისპირეთში, რაც მათ, ჩვენგან დიდად განსხვავებულ ბიუჯეტზე მეტყველებს. “კოლხეთი” მორიგ მატჩს 8 თებერვალს ავსტრიულ ლასკ-თან გამართავს, რომელიც ერტს ლიგის ლიდერია და ბუნდესლიგაში გადასვლისთვის იბრძვის”.

აქვე მოგახსენებთ, რომ ლიბიის “ალ აჰლის” მთავარი მწვრთნელი ლეგენდარული ჰოლანდიელი ფეხბურთელი რუდი კროლი გახლავთ.