“სანტიაგო ბერნაბეუზე” გუშინ ესპანეთის ჩემპიონატის მე-16 ტურის გამოტოვებული შეხვედრა გაიმართა, სადაც ადგილობრივმა “რეალმა” ანდალუსიურ “სევილიას” უმასპინძლა და მინიმალური სხვაობით დაამარცხა.

ანგარიში შეხვედრის დებიუტშივე გაიხსნა მე-12 წუთზე მარსელოს ჩაწოდებულს ხამეს როდრიგესი გამოეხმაურა და თავური დარტყმით ანგარიში გახსნა. სტუმრებს გათანაბრება მალევე შეეძლოთ, ვისენტე იბორამ იკერ კასილასი მოატყუა, მაგრამ მახვილი კუთხიდან ძელს გაარტყა. გამოუყენებელი მომენტისთვის “დალაქები” დაისაჯნენ და 36-ე წუთზე ტრავმირებული ხამესის ნაცვლად შემოსულმა ხესემ სხვაობა გაზარდა. აღსანიშნავია, რომ პირველ ნახევარში კლუბებს 3 იძულებითი შეცვლის განხორციელება მოუწიათ. მე-9 წუთზე სერხიო რამოსი ნაჩომ შეცვალა, 27-ე წუთზე ხამესის ნაცვლად ხესე გამოჩნდა, ხოლო 35-ე წუთზე ბენზემასთან შეჯახების შემდეგ ბეტო დაშავდა და მის მაგივრად რიკო ჩადგა კარში.

მეორე ნახევარში “რეალი” ბევრს აღარ უტევდა, თუმცა რიკოს ორი რთული ბურთის აღება მაინც მოუწია. მატჩი ბოლოსკენ დაიძაბა, მე-80 წუთზე ვიტოლომ მარცხენა ფლანგზე გაილაღა, მეტოქის საჯარიმოში შეიჭრა და ზუსტად უპასა შეცვლაზე შემოსულ იაგო ასპასს, რომელმაც შეხვედრაში ინტრიგა დააბრუნა. დარჩენილ დროში “დალაქებს” რამდენიმე ნახევარმომენტი შეექმნათ, თუმცა ანგარიში აღარ შეცვლილა – 2:1. გეტყვით, რომ 60-ე წუთზე მარსელომ ყვითელი ბარათი მიიღო, რომელიც ბრაზილიელისთვის მიმდინარე ლა ლიგაში მეხუთე აღმოჩნდა, რაც ავტომატურად ერთმატჩიან დისკვალიფიკაციას უდრის. მარსელოს “ატლეტიკოსთან” გასამართი დერბის გამოტოვება მოუწიევს.

“რეალმა” “ბარსელონას” 4, ხოლო “ატლეტიკოს” 7 ქულით გაასწრო. “სევილია” მე-4 ადგილს იკავებს და ერთი ქულით უსწრებს “ვალენსიას”.


რეალი – სევილია 2:1 (2:0)

მადრიდი, “სანტიაგო ბერნაბეუ”

რეალი (4-4-2): კასილასი, რამოსი (ნაჩო 9), ვარანე, მარსელო, არბელოა, ხამეს როდრიგესი (ხესე როდრიგესი 27), ხედირა, კროოსი, ისკო (ილარამენდი 90), ბეილი, ბენზემა.
მწვრთნელი: კარლო ანჩელოტი

სევილია (4-2-3-1): ბეტო (რიკო 35), კოლოდიეჩაკი, კარისო, ფ.ნავარო, ფიგეირაში, მ’ბია, იბორა, კრიშოვიაკი, დეულოფეუ (ვიდალი 54), ვიტოლო, ბაკა (ასპასი 67).
მწვრთნელი: უნაი ემერი

გოლები: 1:0 ხამეს როდრიგესი (12), 2:0 ხესე როდრიგესი (36), 2:1 ასპასი (80).
გაფრთხილებები: ვარანე, მარსელო, ისკო – ფიგეირაში, ნავარო, მ’ბია, კარისო, ვიტოლო, ვიდალი
ბურთის ფლობა: 60%-40%, დარტყმა: 14(4)-15(3), ჯარიმა: 9-21, კუთხური: 4-6, თამაშგარე: 1-1, სეივი: 2-2

ბომბარდირები: კრიშტიანო რონალდუ (“რეალი”) – 28. ლეო მესი (“ბარსელონა”) - 22. ნეიმარი (“ბარსელონა”) – 15. კარლოს ბაკა (“სევილია”) -12.