ხორვატიის 21-წლამდელთა ნაკრების და ლონდონის “ჩელსის” საკუთრებაში მყოფი ცენტრალური თავდამსხმელი სტიპე პერიცა ნახევარწლიანი იჯარის წესით “უდინეზეში” იასპარეზებს. აღნიშნული ინფორმაცია იტალიური კლუბის ოფიციალურმა ვებგვერდმა გაავრცელა.

ახალგაზრდა ფეხბურთელი “არისტოკრატებმა” 2013 წლის ზაფხულში ხორვატიული “ზადარიდან” 2.45 მილიონ ევროს სანაცვლოდ დაიმატეს და ჰოლანდიურ “ბრედაში” 2015 წლის 28 იანვრამდე ჰყავდათ განათხოვრებული.

ნიდერლანდური გუნდის მაისურით მიმდინარე სეზონში თავდამსხმელმა ერედივიზიონში 10 მატჩი ჩაატარა, გაიტანა 3 გოლი და ერთხელაც თანაგუნდელს გაატანინა. პერიცას სატრანსფერო ღირებულება მილიონ ევროს შეადგენს.