ესპანეთის ჩემპიონატის 21-ე ტურის ერთ-ერთი ცენტრალური შეხვედრა “სანტიაგო ბერნაბეუზე” შედგება, სადაც გათამაშების ლიდერი მადრიდის “რეალი” სან-სებასტიანის “რეალ სოსიედადს” უმასპინძლებს.
მადრიდული გრანდი მეორეადგილოსან “ბარსელონას” ერთი ქულით უსწრებს და “სევილიასთან” გასამართი შეხვედრა თადარიგში აქვს. “ბლანკოსმა” გასულ ტურში კინაღამ სუსტ “კორდობასთან” დაკარგა ქულები, თუმცა გარეტ ბეილმა 89-ე წუთზე მოახერხა პენალტის გატანა და თავის გუნდს გამარჯვება მოუპოვა. “კორდობასთან” მატჩში არასპორტული საქციელის გამო კრიშტიანო რონალდუ გააძევეს, რომელიც ესპანეთის ფეხბურთის ფედერაციამ აშკარად დაინდო და მხოლოდ 2-მატჩიანი დისკვალიფიკაცია მიუსაჯა. პორტუგალიელი ვარსკვლავის გარდა, მადრიდელები ტრავმების გამო პეპესა და მოდრიჩს მოისაკლისებენ. რონალდუს ნაცვლად დღეს ასიერ ილარამენდი ითამაშებს, ხოლო ხამეს როდრიგესი წინ აიწევს.
ძალიან უცნაური გუნდია წელს “სოსიედადი”. ბასკურ კლუბს სულ 5 მოგება აქვს ლა ლიგაში და აქედან 3-ჯერ გრანდების დამარცხება მოახერხა. “ჩური ურდინმა” სამივე შემთხვევაში “ანოეტაზე” დაამარცხა მოწინავე გუნდები, ხოლო დღეს ამის გაკეთებას გასვლაზეც ეცდება. დევიდ მოიესს კარლოს მარტინესის გარდა, ყველა შეგირდი მწყობრში ჰყავს. აღსანიშნავია, რომ ბასკთა ნახევარმცველს ხაბი პრიეტოს “სანტიაგო ბერნაბეუზე” 6 გოლი აქვს გატანილი.
19:00 რეალი - სოსიედადი
სავარაუდო შემადგენლობები
რეალი (4-3-3): კასილასი, ვარანე, რამოსი, კარვახალი, მარსელო, ილარამენდი, კროოსი, ისკო, ხამეს როდრიგესი, ბეილი, ბენზემა.
მწვრთნელი: კარლო ანჩელოტი
სოსიედადი (4-2-3-1): რული, ბერჩიჩი, ი.მარტინესი, მ.გონსალესი, ელუსტონდო, გრანერო, ბერგარა, პრიეტო, კანალესი, ველა, აგირეჩე.
მწვრთნელი: დევიდ მოიესი
მსაჯი: ალვარეზ იზკუერდო
მეორე მადრიდული გრანდი “იპარუაზე” ჩავა “ეიბართან” სათამაშოდ. გაისკა გარიტანოს გუნდი მწირი ფინანსური რესურსებით მშვენივრად ახერხებს თამაშს და ლა ლიგაში მე-8 ადგილზე იმყოფება. ბასკური კლუბი კარგადაა შეთამაშებული და ბრძოლისუნარიანობით გამოირჩევა. ლა ლიგის დებიუტანტების დამარცხება ადვილი საქმე ნამდვილად არაა და “როხიბლანკოს” იოლი გასეირნება არ ელის. მასპინძლებს ტრავმირებული ბოვედა და დისკვალიფიცირებული დანი გარსია არ ეყოლებათ.
“ატლეტიკოს” კვირის შუაში ძალიან მძიმე თამაში ჰქონდა “ბარსელონასთან”, რომელიც მათი მარცხით და ესპანეთის თასიდან გამოვარდნით დასრულდა. ამრიგად, დიეგო სიმეონეს შეგირდები ორ ფრონტზე დარჩნენ და ლა ლიგაში ქულების დაკარგვის უფლება აღარ აქვთ. ისინი “ბარსელონას” სამი, ხოლო “რეალს” ოთხი ქულით ჩამორჩებიან. სტუმრებს ტრავმების გამო თურანი და ანსალდი დააკლებიან, ხოლო გაბი დისკვალიფიცირებულია.
21:00 ეიბარი – ატლეტიკო
სავარაუდო შემადგენლობები
ეიბარი (4-2-3-1): ირურეტა, ნავასი, ეკიზა, ლილო, ანიბარო, ერასტი, ბოატენგი, საული, დელ მორალი, კაპა, პიოვაკარი.
მწვრთნელი: გაისკა გარიტანო
ატლეტიკო (4-4-2): მოია, გოდინი, მირანდა, სიკეირა, ხუანფრანი, ტიაგო, მ.სუარესი, რ.გარსია, კოკე, გრიზმანი, მანძუკიჩი.
მწვრთნელი: დიეგო სიმეონე
მსაჯი: პედრო პერეს მონტერო
დღის სხვა მატჩები:
23:00 გრანადა – ელჩე
01:00 სელტა - კორდობა
ტურის ანონსი იხილეთ ამ ბმულზე
