ჰაცუ ბაშოს მე-10 დღე წარუმატებელი გამოდგა ქართველი სუმოისტებისთვის. როგორც ტოჩინოშინმა, ასევე გაგამარუმ მარცხი განიცადეს.

მაკუუჩი დივიზიონში მოასპარეზე ლევან გორგაძე კომუსუბი ტაკაიასუს გაეჯიბრა და იორიკირით წააგო. შედეგად, ტოჩინოშინი მეტად რთულ ვითარებაში აღმოჩნდა. ლევანს დადებითი ბალანსისთვის (კაჩი-კოში) დარჩენილი ხუთივე ბრძოლის მოგება სჭირდება, თორემ წოდებაში დაქვეითება არ ასცდება.

შეგახსენებთ, რომ გორგაძე ტოკიოს “რიოგოკუ კოკუგიკანში” მიმდინარე სუპერტურნირზე დასავლეთის პირველი მაეგაშირას წოდებით ირჯება, მისი მაჩვენებელი კი 3 მოგება და 7 მარცხია. ტოჩინოშინის შემდეგი მეტოქე სეკივაკე იჩინოჯო იქნება.

რანგით მე-2 ძურიოს დივიზიონში 8 გამარჯვების ფონზე მე-2 მარცხი შეემთხვა დასავლეთის მე-2 ნომერ გაგამარუს. თეიმურაზ ჯუღელმა დასავლეთის მე-8 ნომერ კაგაიაკისთან ოშიდაშით წააგო და აღმოსავლეთის მე-3 ნომერ კიტატაიკის ერთპიროვნულად გალიდერების შანსი მისცა. ამ უკანასკნელის აქტივში 9 მოგებაა.

მე-11 საშეჯიბრო დღეს გაგამარუს მაკუუჩიში ასპარეზობის პატივი ექნება და ძალებს დასავლეთის მე-14 მაეგაშირა ჩიომარუსთან მოსინჯავს.

დასასრულ, ისიც ვთქვათ, რომ “იმპერატორის თასის” დასაკუთრების საუკეთესო შანსი მონღოლ იოკოძუნა ჰაკუჰოს გააჩნია, რომელსაც 10-ვე ბრძოლა მოგებული აქვს. “თეთრ ფენიქსს” 1 გამარჯვებით ჩამორჩება მისივე თანამემამულე იოკოძუნა ჰარუმაფუჯი.