ქართველმა კალათბურთელმა ვიქტორ სანიკიძემ ყაზანის “უნიკსის” მწვრთნელ ევგენი პაშუტინის გული ვერაფრით მოიგო. ვთბ-ლიგის ეგიდით გამართულ რუსულ დერბიში, რომელშიც ყაზანელები სარატოვში “ავტოდორთან” 69:87 განადგურდნენ, ვიკას მხოლოდ 02:50 წუთი დაუთმეს.

აღნიშნულ დროში ქართველმა ფორვარდმა 2 საჯარიმო ააცილა, ბურთი ერთხელ დაკარგა, აქტივში კი 1 მოხსნა და 1 დაფარება ჰქონდა.

“უნიკსის” რიგებში 16-16 ქულით ამერიკელი ლეგიონერები ჯეიმს უაიტი და კიტ ლენგფორდი გამოირჩნენ, მასპინძლებს კი უკრაინელა ცენტრმა კირილ ფესენკომ ულიდერა – 23 ქულა, 16 მოხსნა.

ისიც ვთქვათ, რომ სანიკიძის არყოფნაში, რომელიც ფარზე ბრძოლისას გამორჩეულია, სტუმრები მოხსნებში 27:54 (!) განადგურდნენ, ანუ ამ კომპონენტში მეტოქეს ზუსტად 2-ჯერ ჩამორჩნენ, რაც ძალიან იშვიათად ხდება.

“უნიკსი” 9 მოგებით და 5 მარცხით ვთბ-ლიგაში მე-5 ადგილამდე დაქვეითდა, მომდევნო მატჩს კი 25 იანვარს მანუჩარ მარკიშვილის ცსკა-ს წინააღმდეგ გამართავს.

მანამდე, 21-ში ყაზანელები ევროთასის ეგიდით კიდევ ერთ რუსულ კლუბ სანკტ-პეტერბურგის “ზენიტს” დაუხვდებიან.