მადრიდის “რეალის” მთავარი მწვრთნელის, კარლო ანჩელოტის თქმით, მისი გუნდის ლიდერი კრიშტიანუ რონალდუ “სოსიედადთან” გასამართ მატჩში მონაწილეობას არ მიიღებს.
ესპანური პრესის ცნობით, ბოლო დროს, რონალდუ ტრავმით თამაშობს. ამას ისიც დაემატა, რომ “დორტმუნთან” გამართულ დაპირისპირებაში, პორტუგალიელმა ფეხი იტკინა და მწვრთნელმა მისი დასვენება გადაწყვიტა.
“კრიშტიანუ დაისვენებს. რონალდუ დაიღალა და მას მცირე პრობლემა აქვს. გვინდა, რომ ის მადრიდში დარჩეს და მომდევნო მატჩისთვის მოემზადოს.
რონალდუ სამშაბათის მატჩისთვის მზად იქნება. მან ძალიან ბევრი ითამაშა და გვინდა დავასვენოთ. კრიშტიანუსთან ვისაუბრე და ეს გადაწყვეტილება ერთად მივიღეთ, თუმცა მას ყველა თამაშში მონაწილეობა სურს.
ვინ შეცვლის რონალდუს? რამდენიმე ვარიანტი გვაქვს. შესაძლოა, მორატამ ითამაშოს, ისკომ სათამაშო პოზიცია შეიცვალოს, ან ადგილი სხვა თავდამსხმელს შევუცვალოთ. ბეილი კარგად თამაშობს და მას რონალდუს შეცვლა შეუძლია.” – ციტირებს ანჩელოტის სიტყვებს Goal-ი.
