მილანის „ინტერისა“ და ნიდერლანდების ნაკრების მარჯვენა მცველი დენზელ დუმფრისი კარიერას მადრიდის „რეალში“ გააგრძელებს.
ტრანსფერზე ყველანაირი შეთანხმება პრაქტიკულად მიღწეულია - „რეალი“ გადაიხდის გამოსასყიდ თანხას, რაც სულ რაღაც 20 მილიონი ევროა. დუმფრისი ჟოზე მოურინიოს მთავარი სამიზნეა და მოსალოდნელია, რომ გარიგება სულ მალე გაოფიციალურდება.
30 წლის დენზელ დუმფრისი „ინტერში“ 2021 წლიდან თამაშობდა და 207 მატჩში 27 გოლი გაიტანა. მანამდე ნიდერლანდელი სამშობლოში, „სპარტას“, „ჰერენვეენისა“ და პსვ ეინდჰოვენის ღირსებას იცავდა.
„ინტერი“ დუმფრისის შეცვლას მარკო პალესტრათი აპირებს, რომელმაც „კალიარიში“ შესანიშნავი სეზონი ჩაატარა. ახალგაზრდა იტალიელი „ატალანტას“ საკუთრებაშია და მინიმუმ 50 მილიონი ევრო ღირს. „ინტერს“ მოლაპარაკებების დასაწყებად 40 მილიონი არ ეყოფა, რადგან პალესტრას მიმართ ინტერესს პრემიერლიგის კლუბებიც იჩენენ და „ატალანტას“ საწყისი მოთხოვნა 50 მილიონი ევროა.
