ბულგარეთის ქალაქ სამოკოვში, სადაც თავისუფალ, ბერძნულ-რომაულ სტილსა და გოგონათა ჭიდაობაში 17-წლამდელთა ევროპის ჩემპიონატი გაიმართა, საქართველოს გოგონათა და ვაჟთა ნაკრებებმა მედლები მოიპოვეს.

შედეგიანი ტურნირი ჰქონდათ თავისუფალი სტილით მოჭიდავეებს. ჩვენმა გუნდმა ათი წონითი კატეგორიიდან ექვსში მედლის დასაკუთრება შეძლო. მათ შორის საუკეთესო შედეგს მიაღწია მძიმეწონოსანმა მურთაზ ბაღდავაძემ (110 კგ) - მან ფინალამდე გაიკვალა გზა და გადამწყვეტ შეხვედრაში მასპინძელი რაჩევ სტეფანოვი 3:0 დაამარცხა.

ბრინჯაოს მედლები დაიმსახურეს გიორგი ნარიმანიძემ (51 კგ), თემურ თუთარაშვილმა (55 კგ), დავით მძევაშვილმა (60 კგ), რატი რევაზაშვილმა (80 კგ) და ნურადინ მუსტაფაევმა (92 კგ). გარდა ამისა, „თავისუფლებმა" გუნდურ ჩათვლაში 109 ქულა დააგროვეს და მესამე ადგილი დაიკავეს.

ბერძნულ-რომაული სტილით მოჭიდავეთა ნაკრებიც ათივე წონით კატეგორიაში იყო წარმოდგენილი და ასპარეზობა სამი მედლით დაასრულა. ჩემპიონობამდე ცოტა დააკლდა რამაზ ბასილიას (71 კგ) - იგი ფინალში სომეხ იანეს აზარიანთან 0:4 დამარცხდა და კვარცხლბეკის მეორე საფეხურზე ავიდა. ბრინჯაოს მედლები კი ლუკა ბუიღლიშვილმა (80 კგ) და საბა ტაკიძემ (110 კგ) მოიპოვეს.

გოგონათა გუნდიდან, რომელიც ჩემპიონატზე სამი მოჭიდავით იყო წარმოდგენილი, ბრინჯაოს მედალი ნინო სამხარაძემ (69 კგ) დაიმსახურა. მან მესამე ადგილისთვის გამართულ შეხვედრაში მოლდაველი ევპრაჰია კაზაკუ 9:4 დაამარცხა.

GEONOC.ORG.GE