„კრემონეზეს“ ფეხბურთელი დაჩი ლორთქიფანიძე სერია A-ში დებიუტის შემდეგ ადგილობრივ მედიას ესაუბრა.
როგორც მან თქვა, მოედანზე მშვიდად შევიდა, რადგან ამ მომენტს დიდი ხანი ელოდა, ხოლო ემოციები მხოლოდ მატჩის დასრულების შემდეგ დაეუფლა.
„მწვრთნელმა მატჩის დაწყებამდე გამაფრთხილა, რომ შეიძლება მოედანზე შესვლის უფლება მოეცა და იმ მომენტიდან კონცენტრირებული და მზად ვიყავი. გულწრფელად რომ ვთქვა, საკმაოდ მშვიდად ვიყავი, წლების განმავლობაში ვმუშაობდი და ვვარჯიშობდი ამ მომენტისთვის. ძალიან კონცენტრირებული ვიყავი და უნდა ვთქვა, საკმაოდ მშვიდად ვიყავი. ემოციები მატჩის შემდეგ დამეუფლა. როდესაც ის დასრულდა, მაშინ განვიცადე ნამდვილი ემოციები.
სიმართლე გითხრათ, არ მეგონა, რომ ასე მალე მექნებოდა დებიუტი. სწორედ ამიტომ მიმაჩნია მწვრთნელის მიერ მოცემული შესაძლებლობა მართლაც უზარმაზარ შესაძლებლობად. ვგრძნობ მის ნდობას და ეს ძალიან ბევრს ნიშნავს ჩემი განვითარებისთვის.
„კრემონეზეს“ მაისური ჩემთვის ძალიან მნიშვნელოვანია, რადგან ერთი წლის წინ საკმაოდ მნიშვნელოვანი შეთავაზება მივიღე ბუნდესლიგის გუნდისგან, მაგრამ მჯეროდა პროექტის, მჯეროდა იმის, რასაც ამდენი წლის განმავლობაში ვაკეთებდი და „კრემონეზესთან“ გავაფორმე კონტრაქტი. ყოველთვის მჯეროდა ამ მაისურის, ყოველთვის მჯეროდა პროექტის და მინდა მადლობა გადავუხადო მწვრთნელს, რომელმაც ეს შესაძლებლობა მომცა, დირექტორს და ყველას, ვინც დამეხმარა პირველ გუნდში. მინდა ვუთხრა ყველა ბავშვს, ვინც ამ სპორტულ ცენტრში ვარჯიშობს, რომ ყოველთვის სჯეროდეთ საკუთარი ოცნებების და გააცნობიერონ, რომ მათ შეუძლიათ მიზნების მიღწევა.
საქართველო ნაკრები ასევე აუცილებელია ჩემი ზრდისთვის: 21 წლამდელთა ნაკრებთან ერთად შემიძლია ევროპის ჩემპიონატის ფინალურ ეტაპზე გასასვლელად ბრძოლა”, - თქვა დაჩიმ.
შეგახსენებთ, რომ დაჩი ლორთქიფანიძე „კრემონეზეს“ აღზრდილია და მთავარ გუნდში მიმდინარე სეზონში დააწინაურეს. ის აქამდე განაცხადში მუდმივად ხვდებოდა, მაგრამ თამაშის შესაძლებლობა პირველად მიეცა.
„კრემონეზეს“ შვიდ ტურში 10 ქულა აქვს და მომდევნო მატჩს 25 ოქტომბერს, „ატალანტასთან“ გამართავს.
