„ნაპოლი“ „ნიუკასლის“ ინტერესის შესახებ გავრცელებული ინფორმაციის შემდეგ ხვიჩა კვარაცხელიას შენარჩუნებაზე მუშაობს. ამის შესახებ Gazzetta Dello Sport-ი იტყობინება.

წყაროს თანახმად, აურელიო დე ლაურენტისი 22 წლის ქართველ ფეხბურთელს კონტრაქტის გახანგრძლივებას 2028 წლის ზაფხულამდე სთავაზობს, 2029 წლამდე განახლების ვარიანტით, რომლის თანახმად, მისი ხელფასი 1.2 მილიონი ევროდან 2.5 მილიონ ევრომდე გაიზრდება.

წყაროს თანახმად, ხვიჩას აგენტმა მამუკა ჯუღელმა ახალი კონტრაქტის პირობები უკვე დააწესა, ამიტომაც მხარეები არ ჩქარობენ და შეთანხმების მიღწევას მიმდინარე სატრანსფერო ბაზრის ბოლომდე იმედოვნებენ. Gazzetta Dello Sport-ის ცნობით, მომდევნო ხუთი სეზონისთვის ხვიჩა 12 მილიონ ევროზე მეტს გამოიმუშავებს.

შეგახსენებთ, რომ მოქმედი კონტრაქტი ქართველ ფეხბურთელს 2027 წლის 30 ივნისამდე აკავშირებს. ბრიტანული მედია წერდა, რომ კვარაცხელიაში „ნიუკასლი“ 100 მილიონ ევროს სთავაზობს, თუმცა, „ნაპოლის“ ფეხბურთელის გაყიდვა არ სურს.