„ვალენსიას“ ფეხბურთელი გიორგი მამარდაშვილი ლა ლიგამ 35-ე ტურის საუკეთესო მეკარედ დაასახელა. აღსანიშნავია, რომ გიორგიმ ეს წოდება ზედიზედ მეორედ მოიპოვა, რადგან წინა ტურშიც საუკეთესოდ აღიარეს.
მამარდაშვილმა მადრიდის „რეალის“ წინააღმდეგ ბრწყინვალედ ითამაშა, 5 ბურთი მოიგერია და თავის გუნდს მოგებაში დაეხმარა (1:0). ის მატჩის საუკეთესო ფეხბურთელადაც დაასახელეს.
აქვე გეტყვით, რომ მამარდაშვილი მიმდინარე სეზონში მესამედ გახდა ტურის საუკეთესო მეკარე: მე-20, 34-ე და 35-ე ტურებში. ცნობისთვის, გასულ სეზონში ეს პატივი ორჯერ ხვდა წილად (პირველ და 35-ე ტურებში).
გიორგი მამარდაშვილს ლა ლიგის მიმდინარე სეზონში 35 შეხვედრაში 41 გოლი აქვს გაშვებული და კარი მშრალად შვიდჯერ შეინახა. ისიც ვთქვათ, რომ ამ ტურის საუკეთესო სეივიც მის აქტივშია, ლა ლიგის ვერსიით.
