„ბარსელონაში“ ლიონელ მესის დაბრუნებაზე უკვე კლუბის წარმომადგენლები აქტიურად საუბრობენ. მთავარმა მწვრთნელმა ჩავიმ საჯაროდ თქვა, რომ არგენტინელის დაბრუნება სურს.
„მასთან ხშირად ვსაუბრობ, რადგან ის ჩემი მეგობარია, მაგრამ ახლა ამის დრო არ არის. განვიხილავთ ამ საკითხს, იმედი მაქვს, რომ ლეოს სახლში ვნახავ, მე ვარ პირველი, ვისაც გაუხარდება ისტორიაში საუკეთესო ფეხბურთელი რომ დაბრუნდეს. თუმცა, ახლა არც სატრანსფერო ბაზარზე და არც ლეოზე საუბრის დროა. ორი ტიტულის მოპოვებამდე ორი თვე რჩება.
მესის დაბრუნება ბევრ ფაქტორზე იქნება დამოკიდებული, მჯერა, რომ ყველაზე მნიშვნელოვანია ლეოს სურვილი და ხელმისაწვდომობა. მან იცის, რომ ეს მისი სახლია, კარი ღიაა და მოხარული ვიქნებით, თუ დაბრუნება სურს“, - თქვა ჩავიმ.
გარდა ამისა, მესის დაბრუნებაზე ისაუბრა „ბარსას“ ვიცე-პრეზიდენტმა რაფა იუსტემ, რომელმაც აღნიშნა, რომ ძალიან გაუხარდება, თუ ლიონელი კლუბში დაბრუნდება.
„რა თქმა უნდა ვისურვებდი, რომ დაბრუნდეს. თუნდაც იმის გამო, რისი მოტანა შეუძლია ჩვენი კლუბისთვის სპორტულ, სოციალურ და ეკონომიკურ დონეზე. კარგი ისტორიები ცხოვრებაში კარგად უნდა დასრულდეს. ლეომ და მისმა ოჯახმა იციან, რამდენად ვზრუნავ მათზე. მე ვმონაწილეობდი მოლაპარაკებებში, რომელიც სამწუხაროდ წარმატებით არ დასრულდა. რა თქმა უნდა, მსურს მისი დაბრუნება, ჩვენ მასთან კონტაქტი გვაქვს, დიახ“, - განაცხადა იუსტემ.
შეგახსენებთ, რომ ლიონელ მესის „პარი სენ ჟერმენთან“ კონტრაქტი მიმდინარე სეზონის ბოლოს ეწურება. ჯერჯერობით, უცნობია, სად ითამაშებს არგენტინელი ვარსკვლავი მომდევნო სეზონში.
