ესპანელმა სკაუტმა პაბლო სეიხასმა ხვიჩა კვარაცხელიაზე ისაუბრა. როგორც მან განაცხადა, რომ ქართველი ფეხბურთელის შეძენასთან „სევილია“ ახლოს იყო, მაგრამ სპორტულმა დირექტორმა მონჩიმ მის 6 მილიონ ევროდ შეძენაზე უარი თქვა.

გარდა ამისა, სეიხასი ფიქრობს, რომ ხვიჩა „ნაპოლიდან“ კარიერას ინგლისის პრემიერლიგაში გააგრძელებს, რადგან 100 მილიონი ევროს გადახდა მხოლოდ ინგლისელებს შეუძლიათ.

„ლაპარაკი იყო „ვალენსიაზე“, „ლევანტესა“ და „სევილიაზე“, დაახლოებით 6 მილიონ ევროზე. „სევილიაში“ გადასვლასთან ყველაზე ახლოს იყო, მაგრამ მონჩიმ მასზე უარი თქვა, მათ ვერ შეამჩნიეს, როგორი ფეხბურთელი შეიძლებოდა გამხდარიყო.

ის ახლა 100 მილიონი ევრო ღირს. მას შეუძლია მადრიდის „რეალში“ ან „ბარსელონაში“ კარგად თამაში, მაგრამ ვფიქრობ, რომ პრემიერლიგაში გადავა, რადგან მხოლოდ იქ შეუძლიათ ასეთი თანხის გადახდა“, - განაცხადა სეიხასმა.

შეგახსენებთ, ხვიჩა კვარაცხელიამ მიმდინარე სეზონში ყველა ტურნირზე ჩატარებულ 30 მატჩში 14 გოლი გაიტანა, 14 საგოლე პასი გააკეთა და ოთხჯერ პენალტი მოიპოვა.