აფრიკული ქვეყნები რომ უცნაურობებით გამოირჩევა ამაში არაერთხელ დავრწმუნდით. ამჯერად მათმა მოფიქრების უნარმა ახალ დონეს მიაღწია.



ეგვიპტის მეორე დივიზიონში, „სუეზისა“ და „ალ ნასრის“ შეხვედრის ბოლო წუთზე, როდესაც „სუეზი“ მატჩს 2:1-ს იგებდა, მეტოქემ ანგარიში გაათანაბრა, რასაც „ალ ნასრის“ ფეხბურთელებში დიდი სიხარული და ჟრიამული მოჰყვა. სამაგიეროდ, მასპინძელი გუნდის ფეხბურთელები და სამწვრთნელო შტაბის წევრები სასწრაფოდ შემოეხვივნენ მთავარ მსაჯს. მათი აღშფოთების მიზეზი ის იყო, რომ მათი აზრით, „ალ ნასრის“ ფეხბურთელმა გოლი თამაშგარე მდგომარეობიდან გაიტანა.

მატჩი ეგვიპტის მეორე დივიზიონის ეგიდით იმართებოდა. რა თქმა უნდა ვიდეო რეფერი შეხვედრაში არ იყო, თუმცა... როგორც ჩანს იყო. მთავარი მსაჯი ტრიბუნებთან მივიდა, ერთ-ერთ გულშემატკივარს ტელეფონი გამოართვა, მასში გადაღებულ მომენტს უყურა და „ალ ნასრს“ გოლი გაუუქმა.

ამ მომენტმა იმდენი ხანი წაიღო, რომ შეხვედრას 15 წუთი დაემატა, ამ დროში კი „სუეზმა“ მესამე გოლიც გაიტანა და საბოლოოდ, 3:1 მოიგო.

მსაჯმა მოედანი პოლიციის თანხლებით დატოვა, რადგან „ალ ნასრის“ ფეხბურთელები და გულშემატკივრები მას ემუქრებოდნენ.