შვეიცარიელმა მარკო ოდერმატმა, ანდორაში მსოფლიო თასის გიგანტური სლალომის ბოლო ეტაპი მოიგო და ლეგენდარული ავსტრიელის, ჰერმან მაიერის 23 წლის წინანდელი რეკორდი გააუმჯობესა - ერთ სეზონში 2 000 ქულაზე მეტი დააგროვა.

25 წლის ოდერმატმა ორი ცდის ჯამში, 2.11 წამით აჯობა მეორეზე გასულ ნორვეგიელ ჰენრიკ კრისტოფერსენს და გამარჯვებასთან ერთად, რეკორდსმენიც გახდა. ამ სეზონში მან უკვე 2 042 ქულა დააგროვა, რაც მაიერის რეკორდზე 42 ქულით მეტია.

„წარმოდგენა არ მაქვს, როგორ მოვიგე, ისეთი დაღლილი ვიყავი. ხუთშაბათს დრო გავატარეთ. ამ 2 000 ქულის გამო, დღეს იოლი რბოლა არ მქონდა. კვარცხლბეკზე ასვლა ძალიან მინდოდა. მაგრამ მოვიგე და თან ორ წამზე მეტით. არ ვიცი, რა ვთქვა. წინა დღეებში ვამბობდი, რომ ამ რეკორდს ჩემთვის მნიშვნელობა არ ჰქონდა. მაგრამ ეს ჩემთვის ძვირფასია. ამიტომ დღეს დიდ ზეწოლას ვგრძნობდი. ბედნიერი ვარ, რომ ეს შევძელი“, - განაცხადა ოდერმატმა.

მისთვის ეს ამ სეზონში მე-13 გამარჯვებაა. მის გარდა, ერთ სეზონში ამდენი რბოლა იმავე მაიერს, შვედ ინგემარ სტენმარკს და ავსტრიელ მარსელ ჰირშერს აქვთ მოგებული.