ნეაპოლში, „ნაპოლისა“ და „აინტრახტის“ ფანებს შორის დაპირისპირებაა. მიუხედავად იმისა, რომ შეტაკებების თავიდან ასაცილებლად, გერმანელ ფანებს მატჩზე დასწრების უფლება არ მისცეს, მათი ნაწილი ნეაპოლში მაინც ჩავიდა.

მთელი დღის განმავლობაში ფრანკფურტელმა ფანებმა ნეაპოლის ქუჩებში მსვლელობა მოაწყვეს, რითაც გადაადგილებას ხელი შეუშალეს.

ბოლო ცნობებით კი, ორივე გუნდის ქომაგებს შეტაკებები მოხდა, რამაც ქუჩაში ხანძარიც გამოიწვია. ჯერჯერობით, დაშავებულების ან დაკავებულების შესახებ ინფორმაცია არ ვრცელდება.

Gazetta dello Sport-ის ცნობით, Via Calata Trinita Maggiore-ში გერმანელმა გულშემატკივრებმა რამდენიმე მანქანა, მათ შორის პოლიციის მანქანა დაწვეს. გარდა ამისა, დაზიანდა ტერიტორიაზე არსებული ბარები და განადგურდა ბარებისა და რესტორნების მაგიდები, სკამები და ვიტრინები.

ნეაპოლიტანური გამოცემები წერენ, მატჩის დაწყებამდე სიტუაციის კიდევ უფრო გაუარესებაა მოსალოდნელი. ჯერჯერობით, კლუბებს მომხდარ ინციდენტებზე ოფიციალური განცხადება არ გაუკეთებიათ.

შეგახსენებთ, რომ „ნაპოლიმ“ პირველი მატჩი სტუმრად 2:0 მოიგო და ჩემპიონთა ლიგის მეოთხედფინალში ისტორიაში პირველად გასვლასთან ძალიან ახლოსაა.