იტალიის ნაკრებმა ახალი დიზაინის მაისური წარადგინა, რომლითაც „სკუადრა აძურა“ ევრო 2024-ის შესარჩევ ეტაპზე ითამაშებს.
მთავარი სიახლე ისაა, რომ 2002 წლის შემდეგ პირველად იტალიის ნაკრებს Puma აღარ შემოსავს. გერმანული კომპანია Adidas-მა ჩაანაცვლა, რომელმაც იტალიისთვის საშინაო და საგარეო მაისურები დაამზადა.
ახალი ფორმები „სკუადრა აძურას“ მოქმედმა ფეხბურთელებმა წარმოადგინეს, მაგრამ პრეზენტაციაში ასევე მონაწილეობდა იტალიური ფეხბურთის ლეგენდა ალესანდრო დელ პიერო.
შეგახსენებთ, რომ Puma-ს პერიოდში იტალიის ნაკრები მსოფლიოსა და ევროპის ჩემპიონი გახდა. „სკუადრა აძურა“ ევრო 2024-ის შესარჩევ ეტაპზე ინგლისის, უკრაინის, ჩრდილოეთ მაკედონიისა და მალტის ნაკრებებს დაუპირისპირდება.
