ჰანს-დიტერ ფლიკს გერმანიის საფეხბურთო კავშირში ნდობა გამოუცხადეს და შესაბამისად, გერმანიის ნაკრების მთავარ მწვრთნელად რჩება.
ფედერაციის პრეზიდენტმა ბერნდ ნოიენდორფმა დაადასტურა, რომ ფლიკს ენდობიან და ის „ბუნდესნაკრებს“ ევროპის ჩემპიონატზეც უხელმძღვანელებს.
„ჩვენი მიზანია, რომ ევროპის ჩემპიონატი სპორტულ წარმატებად ვაქციოთ და დარწმუნებულნი ვართ, რომ ეს გერმანიისთვის დიდი შანსია. სრული ნდობა გვაქვს ჰანსი ფლიკის მიმართ, რომელიც ამ გამოწვევას გაუმკლავდება. ოპტიმისტურად ვართ განწყობილი, შეგვიძლია ბევრად მეტს მივაღწიოთ, ვიდრე კატარში ვაჩვენეთ, სადაც ხელიდან დიდი შანსი გავუშვით, მაგრამ ამ გაკვეთილს ვისწავლით“, - აღნიშნა მან.
შეგახსენებთ, რომ ჰანს-დიტერ ფლიკმა გერმანიის ნაკრებში 2021 წელს იოახიმ ლიოვი შეცვალა, მაგრამ მისი ხელმძღვანელობით „ბუნდესნაკრები“ მსოფლიოს ჩემპიონატზე ჯგუფიდან ვერ გავიდა. გერმანია ევრო 2024-ის მასპინძელია და შესაბამისად, ფინალურ ეტაპზე თამაშის უფლება ავტომატურად მოპოვებული აქვს.
