ფეხბურთი

23:52 | 23.09.2022 | ნანახია [] - ჯერ

ხვიჩა კვარაცხელია: "ტაბლოზე არ წერია, მაგრამ ყველამ იცის, რომ ის გოლი ზივზივაძემ გაიტანა"

საქართველოს ნაკრების ფეხბურთელმა ხვიჩა კვარაცხელიამ ჩრდილოეთ მაკედონიასთან გამარჯვების (2:0) შემდეგ კომენტარი გააკეთა. როგორც მან თქვა, ბუდუ ზივზივაძემ ძალიან კარგად ითამაშა და გოლი მისი დამსახურებაა. ხვიჩამ აღნიშნა, რომ გიბრალტარში მხოლოდ 3 ქულის მოსაპოვებლად მიდიან.

„მიუხედავად იმისა, რომ პირველი ადგილი ოფიციალურად მოვიპოვეთ, გიბრალტარში მოსაგებად მივდივართ, რადგან გვინდა ჯგუფი გამარჯვებით დავასრულოთ. რაც შეეხება დღევანდელ შეხვედრას, ცოტა რთული თამაში იყო, შეიძლება ხარისხი კარგი არ იყო, მაგრამ მოვიგეთ, გამარჯვება მოვიპოვეთ, მიზანს მივაღწიეთ და ჩემი აზრით, ყველა კმაყოფილია ამ შედეგით.

დიდი მადლობა გულშემატკივრებს, რადგან ისინი 90 წუთი არ ჩერდებიან და საოცარ გარემოს ქმნიან, რაც უფრო მეტ მოტივაციას და ენერგიას გვაძლევს. ელმასი? წარმატებები ვუსურვე, მანაც მომილოცა ეს წარმატება. ძალიან კარგი ადამიანია და ძალიან კარგად ითამაშა.

ძალიან დასაფასებელია ზივზივაძის პასი, მნიშვნელობა არ აქვს, ტაბლოზე კვარაცხელია ეწერება თუ ზივზივაძე, რადგან ჩვენ ერთი გუნდი ვართ. ძალიან მაგრად მოიქცა ბუდუ და 100%-ით მისი გოლი იყო. შეიძლება ეს ტაბლოზე არ აისახა, მაგრამ ყველამ იცის, რომ დღეს გოლი ბუდუმ გაიტანა.

გულშემატკივრები ჩემს სახელს სკანდირებდნენ? დიდი მადლობა, ძალიან მამხნევებენ, დიდ მოტივაციას მაძლევენ და ძალიან მიხარია, როცა საქართველოში ჩამოვდივარ და აქ ვთამაშობ“, - თქვა კვარაცხელიამ.

შეგახსენებთ, საქართველოს ნაკრებმა ამ გამარჯვებით ხუთ ტურში 13 ქულა დააგროვა და ჯგუფში პირველი ადგილი ოფიციალურად გაინაღდა, რაც ნიშნავს: ერთა ლიგის მომდევნო სეზონში საქართველო B დივიზიონში ითამაშებს, გარდა ამისა, ევრო 2024-ის პლეი-ოფში ოფიციალურად გავიდა, რომელიც 2024 წლის მარტში გაიმართება.

და, რა თქმა უნდა, კიდევ ერთი: საქართველოს ნაკრებისთვის ეს იყო ზედიზედ მეათე წაუგებელი მატჩი, რითაც 2010-2011 წლებში თემურ ქეცბაიას გუნდის დამყარებული რეკორდი გაიმეორა. თუ სანიოლის გუნდი გიბრალტართან არ წააგებს, რეკორდს ხელში მარტო ჩაიგდებს. საქართველოს წაუგებელი სერია გასული წლის ოქტომბრიდან დაიწყო და 10 მატჩიდან ქართველებმა 8 მოიგეს (კოსოვოსთან 2:1, შვედეთთან 2:0, უზბეკეთთან 1:0, ბოსნიასთან 1:0, გიბრალტართან 4:0, ბულგარეთთან 5:2, ჩრდილოეთ მაკედონიასთან 3:0 და 2:0), 2-ჯერ ფრეს დასჯერდნენ (ალბანეთსა და ბულგარეთთან 0:0).

საქართველოს ნაკრები მომდევნო მატჩს 26 სექტემბერს, სტუმრად, გიბრალტარის ნაკრებთან ჩაატარებს და ერთა ლიგის 2022-2023 წლების სეზონის ჯგუფურ ეტაპს დაასრულებს.

სარეკლამო ადგილი - 23
250 x 500
0.12931