ევროპის საკალათბურთო ჩემპიონატს პირველი ფინალისტი ჰყავს - საფრანგეთის ნაკრები. ვინსენ კოლეს გუნდმა თურქეთსა და იტალიასთან დრამატული მოგებების შემდეგ ნახევარფინალში პოლონეთს აჯობა, რომელმაც თავის მხრივ კიდევ ერთი სასწაული ვერ მოახდინა.

საფრანგეთის ნაკრებმა თავიდანვე დიდი უპირატესობა მოიპოვა და მართლაც ძალიან იოლად, 41-ქულიანი სხვაობით, 95:54 მოიგო. აღსანიშნავია, რომ პოლონეთის ნაკრებს პირველი ტაიმის შემდეგ მხოლოდ 18 ქულა ჰქონდა დაგროვილი და ბუნებრივია, ფინალის საგზურისთვის ბრძოლა საერთოდ ვერ მოახერხა.

საფრანგეთის ნაკრებში საუკეთესო ჟერშონ იაბუსელე იყო 22 ქულით, 10-10 ქულით ელი ოკობოსა და ევან ფურნიეს. აღსანიშნავია, რომ ფრანგების რიგებიდან ქულა ყველა კალათბურთელმა მოიპოვა. ისიც სათქმელია, რომ იოლი გამარჯვების შედეგად, კოლემ გუნდის ლიდერები დაასვენა და ძალიან ცოტა ხანი ათამაშა. პოლონელთაგან ყველაზე შედეგიანი მიხალ მიხალაკი იყო, რომელმაც 9 ქულა ჩააგდო, ისევე, როგორც ეი ჯეი სლოთერმა.

ამრიგად, საფრანგეთი ფინალშია, ხოლო პოლონეთი მესამე ადგილისთვის იბრძოლებს.

პოლონეთი - საფრანგეთი 54:95 (9:15, 9:19, 18:30, 18:31)