ბელგიურმა „სერენმა“ იუპილერ ლიგაში ადგილი შეინარჩუნა, რაშიც გიორგი მიქაუტაძემ დიდი წვლილი შეიტანა. სხვა თუ არაფერი, ქართველმა ფორვარდმა პლეი-ოფში „მოლენბეკთან“ ორმატჩიან დუელში ერთადერთი და გადამწყვეტი გოლი გაიტანა.

„სერენის“ ვებგვერდზე მიქაუტაძესთან ინტერვიუ გამოქვეყნდა, რომელშიც მან სეზონი შეაჯამა და თქვა, რომ 2021-2022 წლების სეზონით კმაყოფილია.

- როგორ შეაფასებ სეზონს, პირად და გუნდურ დონეზე?

- პირადად მე საკმაოდ კმაყოფილი ვარ ჩემი სეზონით. გუნდურ დონეზეც, პირველ რიგში ადგილის შენარჩუნების გამო. ის გავაკეთეთ, რაც უნდა გაგვეკეთებინა.

- რომელია თქვენი საუკეთესო მოგონება სეზონში?

- ლიეჟის სტანდარდთან გამარჯვება და ბოლო მატჩი სახლში, როცა შედეგით ყველა ბედნიერი ვიყავით.

- რომელმა სტადიონმა მოახდინა თქვენზე ყველაზე დიდი შთაბეჭდილება?

- „გენტის“ სტადიონმა.

- რას აპირებთ შვებულების დროს?

- ცოტა ხანს დავისვენებ, მერე კი საქმეს დავუბრუნდები.

- ერთი სიტყვით შეაფასეთ სეზონი...

- საქმე გაკეთებულია.

- გუნდის ფანებს რას ეტყვით?

- მადლობა მხარდაჭერისთვის მთელი სეზონის განმავლობაში, მაშინაც კი, როცა რთული პერიოდი გვქონდა. თქვენ ყოველთვის გვამხნევებდით. მადლობა ყველაფრისთვის.

შეგახსენებთ, გიორგი მიქაუტაძემ „სერენში“ 2021-2022 წლების სეზონი იჯარით გაატარა და ბელგიის იუპილერ ლიგასა და ბელგიის თასზე მთლიანობაში ჩატარებულ 33 მატჩში 14 გოლი გაიტანა და 2 საგოლე პასი გააკეთა. ქართველი ფეხბურთელი ფრანგულ „მეცს“ ეკუთვნის, ჯერჯერობით უცნობია სად ითამაშებს მომდევნო სეზონში.