რუსეთის პრემიერლიგის მე-18 ტურში „არსენალი“ სტუმრად მოსკოვის ცსკა-სთან 0:2 დამარცხდა, ზურიკო დავითაშვილი კი შესვენებაზე შეცვალეს. მიზეზი ტრავმა იყო, რომელიც მან პირველი ტაიმის მიწურულს მიიღო.

თუმცა, როგორც 20 წლის ქართველმა ფეხბურთელმა სერიოზული არაფერია:

„მატჩის გადადებაზე ჩვენთვის არაფერი უთქვამთ. ვიცოდით, რომ მოსკოვში ძალიან ციოდა. რა თქმა უნდა, რთულია, ასეთ ამინდში თამაში, მაგრამ ტრავმაზე ამინდს გავლენა არ მოუხდენია. ცხადია, ზაფხულში თამაში მირჩევნია. დაზიანება? სერიოზული არაფერია“, - თქვა დავითაშვილმა.

ქართველი ფეხბურთელის შესახებ მცირე კომენტარი ტულელთა მთავარმა მწვრთნელმა მიოდრაგ ბოჟოვიჩმა გააკეთა: „ზურიკო დავითაშვილს სისხლჩაქცევა აქვს, მაგრამ რამდენად სერიოზულია ტრავმა, ჯერჯერობით უცნობია“, - განაცხადა ბოჟოვიჩმა.

ტულის „არსენალი” 18 ტურის შემდეგ 19 ქულით მე-12 ადგილზეა და მომდევნო ტურში 26 თებერვალს „სოჭის“ ესტუმრება. რუსეთის ჩემპიონატში სამთვიანი, ზამთრის პაუზა დაიწყო. დავითაშვილს პრემიერლიგაში 3 გოლი აქვს გატანილი, ერთხელ რუსეთის თასზეც გაიტანა.

ყაზანის „რუბინი“ სამარის „კრილია სოვეტოვთან“ 0:2 დამარცხდა და ლეონიდ სლუცკის გუნდი კრიზისშია - ზედიზედ მესამედ წააგო. ხვიჩა კვარაცხელიამ შეუცვლელად ითამაშა, მაგრამ გუნდი მარცხისგან ვერ იხსნა. „რუბინი“ 22 ქულით მეათე ადგილზეა და 26 თებერვალს მომდევნო ტურში „ზენიტს“ ესტუმრება.

ეკატერინბურგის „ურალმა“ სტუმრად „როსტოვი“ 4:1 გაანადგურა და ლუკა გაგნიძემ 89 წუთი ითამაშა. 18 წლის ქართველმა ფეხბურთელმა რუსული კლუბის ძირითადში შეიძლება ითქვას ფეხი მოიკიდა. მან ზედიზედ მესამედ ითამაშა ძირითად შემადგენლობაში, სეზონში კი 11 მატჩი აქვს ჩატარებული. „ურალი“ 19 ქულით მე-11 ადგილზეა და 26 თებერვალს, „ნიჟნი ნოვგოროდს“ სტუმრად შეხვდება.