მსოფლიო რეკორდსმენი უროს ტყორცნაში, ამავე სახეობაში ორგზის ოლიმპიური ჩემპიონი და მსოფლიოს ყოფილი ჩემპიონი, იური სედიხი 66 წლისა გარდაიცვალა. მან ტიტულების უმეტესობა საბჭოთა კავშირის სახელით ასპარეზობისას მოიპოვა, 1986 წელს კი მსოფლიო რეკორდი დაამყარა, რომელიც ამჟამადაც ხელუხლებელია.

სედიხმა ოლიმპიური ჩემპიონის ტიტულები 1976 (მონრეალი, კანადა) და 1980 (მოსკოვი, სსრკ) წლებში მოიპოვა. მსოფლიო ჩემპიონი კი 36 წლისა, 1991 წელს (ტოკიო, იაპონია) გახდა. ევროპის 1986 წლის ჩემპიონატზე, ურო 86.74 მეტრზე გასტყორცნა და მსოფლიო რეკორდი დაამყარა, რომელიც აქამდე ვერავინ გააუმჯობესა.

„იური ჩემი მეგობარი, დამრიგებელი იყო, რომლის მადლიერი ვარ იმისთვის, რომ ჩვენ ერთმანეთს ცხოვრებისეულ გამოცდილებას და საერთო საკაცობრიო ღირებულებებს ვუზიარებდით. ის ორგზის ოლიმპიური ჩემპიონია და მისი მსოფლიო რეკორდი უროს ტყორცნაში, 35 წელია, ვერავინ გააუმჯობესა. ჩვენ იური ყოველთვის გვემახსოვრება“, - ტვიტერზე დაწერა ლეგენდარულმა ჭოკით მხტომელმა, მსოფლიო მძლეოსნობის უფროსმა ვიცე პრეზიდენტმა სერგეი ბუბკამ.