გერმანიის ქალაქ ჰერცოგენაურახში, საგზაო გარბენში, მსოფლიოს ორი რეკორდი გაუმჯობესდა. ქალთა შორის 10 კილომეტრზე კენიელმა აგნეს ტიროპმა ახალი რეკორდით გაიმარჯვა, 5 კილომეტრზე გარბენში კი რეკორდსმენი ეთიოპიელი სანბერე ტეფერი გახდა.
ტიროპი 10 000 მეტრზე (ტრეკი) მსოფლიო ჩემპიონატების ორგზის ბრინჯაოს მედალოსანია. გზაზე 10 კილომეტრი მან 30 წუთსა და 01 წამში გაირბინა და 28 წამით გააუმჯობესა ძველი რეკორდი, რომელიც 19 წლის წინათ, მაროკოელ ასმაე ლეგზაუის ჰქონდა დამყარებული.
მეორე ადგილი ასევე კენიელმა, შეილა ჩეპკირუიმ დაიკავა, ვინც კარგა ხანს, ტიროპთან ერტად დარბოდა, მაგრამ ბოლოს მეტოქის მაღალ ტემპს ვერ გაუძლო. თუმცა ძველ რეკორდს მანაც აჯობა. ფინიშის შემდეგ ტიროპმა განაცხადა, რომ რეკორდის გაუმჯობესებაში, ხელი ჩეპკირუიმ შეუწყო.
5 კილომეტრზე სირბილში, ტეფერიმ ფინიშს 14 წუთსა და 30 წამში მიაღწია და 14 წამით გააუმჯობესა ძველი რეკორდი, რომელიც კენიელ ბეატრის ჩეპკოეჩს ეკუთვნოდა.