როს ბრაუნის განცხადებით, ფორმულა 1-ში შესაძლოა ცალკეული სპრინტერული რბოლებიც გაიმართოს, რომლებიც დიდ პრიზებთან დაკავშირებული არ იქნება.

სპრინტ რბოლები ამ სეზონში, სამი დიდი პრიზის ფარგლებში, ექსპერიმენტის სახით ტარდება. პირველად ის სილვერსტოუნზე გაიმართა, მეორე კი შაბათს, მონცაზე ჩატარდება.

სპრინტ რბოლის დისტანცია 100 კილომეტრით არის შეზღუდული და მასზე ქულები (3-2-1 სისტემით) მხოლოდ სამ საუკეთესო პილოტს ეწერება.

ამჟამად კვალიფიკაციის და სპრინტ რბოლების რამდენიმე ფორმატი განიხილება. ერთ-ერთი მათგანის შესაბამისად, კვალიფიკაცია პარასკევს ჩატარდება და მასზე ადგილები სპრინტის და კვირის რბოლისთვისაც განაწილდება.

ბრაუნი ამბობს, რომ ამ შემთხვევაში, სპრინტ რბოლა განცალკევდება, რადგან მისი შედეგების შესაბამისად, კვირის რბოლის სასტარტო ადგილები არ განაწილდება. მისივე თქმით, ამ შემთხვევაში, სპრინტის შემდეგ, უფრო მეტ პილოტს უნდა მიეცეს ქულები.

მეორე ფორმატი, ახლანდელის მსგავსია და ის სპრინტ რბოლის შედეგებით, მთავარი რბოლის სასტარტო განლაგების განსაზღვრა მოხდება. ბრაუნი ამბობს, რომ ბევრ პილოტს, ცალკე სპრინტების ჩატარების იდეა მოსწონს.

„ფერარის“ შეფი მატია ბინოტო ამბობს, რომ ჯერჯერობით ადრეა სპრინტ რბოლების ფორმატის განსაზღვრა. ის ფიქრობს, რომ კარგი იქნება, თუ კვირის რბოლაში, სტარტზე პილოტები სპრინტის შედგების შესაბამისად, ოღონდ რევერსულად განლაგდებიან - პირველ ადგილზე გასული სტარტზე ბოლო ადგილს დაიკავებს და ასე შემდეგ. ბინოტოს აზრით, ასე რბოლების სანახაობრივი მხარე გაუმჯობესდება. თუმცა „ფერარის“ ამ იდეას არავინ ემხრობა.

„ალფა რომეოს“ ფრედ ვასორი და „მაკლარენის“ ანდრეას ზიდლი ფიქრობენ, რომ ჯერ უმჯობესია, სატესტო რბოლები ჩატარდეს და მსჯელობა ამის შემდეგ გაიმართოს.

მესამე სპრინტ რბოლა ბრაზილიაში, ნოემბერში გაიმართება.