საქართველოს ნაკრების მთავარმა მწვრთნელმა ვილი სანიოლმა რუმინეთთან გამარჯვების (2:1) შემდეგ, რომელიც მისთვის სადებიუტო იყო, კომენტარი გააკეთა. სანიოლმა აღნიშნა, რომ ბედნიერი მოგებით, მაგრამ ისიც თქვა, რომ ალბათ ხარისხობრივად ეს იყო ყველაზე ცუდი თამაში, მას მერე, რაც საქართველოშია.

„ზოგჯერ ფეხბურთი ძნელად გასაგებია. ალბათ ყველაზე ცუდი მატჩი იყო საქართველოში ჩემი ჩამოსვლის შემდეგ. ესპანეთთან უფრო კარგად ვითამაშეთ, ვიდრე დღეს, რუმინეთმა გვაჯობა, თუმცა მოვიგეთ. ბედნიერი ვარ გამარჯვებით, ეს თავდაჯერებისთვის მნიშვნელოვანია. ივნისში ამხანაგური მატჩის თამაში ადვილი არ არის, რადგან სეზონი დასრულებულია, დაღლილობის მომენტია და ფეხბურთელები შეიძლება შვებულებაზეც ფიქრობენ...

ჩემი გამარჯვებაცაა, მაგრამ პირველ რიგში ფეხბურთელების, მოედანზე ისინი არიან და მათი დიდი დამსახურებაა.

რიცხობრივ უპირატესობაში თამაშის შანსი გვქონდა. პირველი ტაიმით კმაყოფილი არ ვიყავი, შეიძლება დაღლილობამ თავი იჩინა. დარწმუნებული ვარ, ამაზე მეტის გაკეთება შეგვიძლია და ეს ესპანეთის ნაკრებთან დავამტკიცეთ. თუ გვინდა, რომ მსოფლიოს ჩემპიონატის შესარჩევ ეტაპზე შანსი გვქონდეს, უკეთესად უნდა ვითამაშოთ. ნიდერლანდებთან მომდევნო მატჩისთვის მოვემზადებით და ვეცდებით უკეთესი კონდიციებში ვიყოთ.

არ მგონია, რომ რუმინეთმა ცუდად ითამაშა. ბევრი ფეხბურთელი კარგ ლიგაში თამაშობს და ჩემზე რამდენიმე ეპიზოდში შთაბეჭდილებაც მოახდინეს. თუმცა, ფეხბურთში ყოველთვის უკეთესი გუნდი არ იმარჯვებს, შესაძლოა, დღეს ფრე უფრო სამართლიანი შედეგი ყოფილიყო. რუმინეთს ახალგაზრდული გუნდი ჰყავს, ინგლისთან წარმატებებს ვუსურვებ. ჩემი გადმოსახედიდან კარგად ითამაშა და დარწმუნებული ვარ, ასეთი თამაშით ბევრ გუნდს პრობლემებს შეუქმნის“, - თქვა სანიოლმა.

შეგახსენებთ, ვილი სანიოლის ხელმძღვანელობით საქართველოს ნაკრებმა 4 მატჩიდან 1 მოიგო, 1 ფრე ითამაშა და ორჯერ დამარცხდა. მომდევნო შეხვედრას კი 6 ივნისს, სტუმრად ნიდერლანდების ნაკრებთან გამართავს.