პოლონეთის დედაქალაქ ვარშავაში ბერძნულ-რომაულ ჭიდაობაში ევროპის ჩემპიონატი დაიწყო, რომლის პირველ საშეჯიბრო დღეს საქართველოს სამი მედლის შანსი აქვს - ერთი ოქრო და ორი ბრინჯაო. ოქროს მედლისთვის 130 კგ წონით კატეგორიაში იაკობ ქაჯაია იბრძოლებს.

იაკობმა ასპარეზობა ჩეხი შტეფან დავიდის წინააღმდეგ დაიწყო და 9:0 სძლია, რასაც რუსეთის სახელით მოასპარეზე ზურაბ გედეხაურთან გამარჯვება მოჰყვა (3:1). ქაჯაიამ ნახევარფინალში ლიეტუველ რომას ფრიდრიკასთან ძალიან იოლად 9:0 მოიგო, ფინალში კი ხვალ თურქ რიზა კაიას ოქროს მედლისთვის გაეჯიბრება.

63 კგ წონით კატეგორიაში ლერი აბულაძემ ჯერ თურქ აბდურაჰმან ალტანს 4:2 აჯობა, მეოთხედფინალში კი გერმანელი ანდრეი გინჩი 9:0 ადვილად დაამარცხა და ნახევარფინალს უწია. აბულაძემ იქ ვერაფერი გააწყო და რუს ჟამბოლატ ლოკიაევთან 5:9 წააგო. ხვალ ლერი ბრინჯაოს მედლისთვის იჭიდავებს.

87 კგ წონით კატეგორიაში ბრინჯაოს მედლის შანსი აქვს თორნიკე ძამაშვილს, რომელმაც პოლონელი მარჩინ კულინიჩი 6:1 და ბულგარელი იოან დიმიტროვი 5:1 დაამარცხა, მეოთხედფინალში კი ბელარუს კირილ მასკევიჩთან 2:9 წააგო, ბელარუსი ფინალში გავიდა და ჩვენებური რეპეშაჟში გაიყოლა, სადაც ის ხვალ იასპარეზებს და ბრინჯაოს მედლისთვის ზედიზედ ორი ბრძოლის მოგება მართებს. სხვათა შორის, ამ წონით კატეგორიაში ფინალში იჭიდავებს სერბეთის სახელით მოასპარეზე ზურაბ დათუნაშვილი, რომელმაც ზედიზედ სამი ბრძოლა მოიგო და ოქროსთვის იბრძვის.

55 კგ წონით კატეგორიაში ნუგზარ წურწუმიამ პირველ წრეში რუმინელ თეოდორ ჰორატაუს 10:0 მოუგო, მაგრამ შემდეგ აზერბაიჯანელ ელდანიზ აზიზლისთან 1:10 წააგო, რომელიც თავის მხრივ ფინალამდე ვერ მივიდა და წურწუმიამ ევროპის ჩემპიონატი უმედლოდ დაასრულა.

77 კგ წონით კატეგორიაში საჩინო დავითაიამ შვედ ბოგდან კურინოის 9:0 მოუგო, მაგრამ შემდეგ ბელარუს ტსიმურ ბერდიევთან 5:6 წააგო. ბელარუსი მოჭიდავე მეოთხედფინალში დამარცხდა და ქართველი ასპარეზობას გამოეთიშა. აქვე გეტყვით, რომ ბერძნულ-რომაულ ჭიდაობაში მედლები ხვალ გათამაშდება და ქართველი მოჭიდავეებიც, რომლებიც მედლისთვის იბრძვიან, ხალიჩაზე ხვალ გავლენ.