კორტინა დ’ამპეცოს მსოფლიო ჩემპიონატის ქალთა პროგრამა, სლალომის რბოლით დაიხურა, რომელიც ავსტრიელი კატარინა ლინსბერგერის გამარჯვებით დასრულდა. მან თითქმის წამით აჯობა მსოფლიო თასის აბსოლუტური ჩათვლის ლიდერს, სლოვაკ პეტრა ვლჰოვას, ვინც ვერცხლს დასჯერდა. ბრინჯაოს მედალი კი ამერიკელმა მიკაელა შიფრინმა მოიპოვა.
ამგვარად, კორტინადან ლინსბერგერი შინ სამი მედლით ბრუნდება, რომელთაგან ორი ოქროსია, ერთი კი - ბრინჯაოსი. მასზე მეტი, ოთხი მედალი აქვს მოპოვებული შიფრინს, ოღონდ მის მონაგარში ერთი ოქრო, ორი ვერცხლი და ერთი ბრინჯაოა. აღსანიშნავია, რომ შიფრინს წინა ოთხ ჩემპიონატზე სლალომში 4 ოქრო აქვს მოპოვებული, ამჯერად კი მხოლოდ ბრინჯაოს დასჯერდა. საინტერესოა, რომ ყოველ რბოლაში, რომელშიც იასპარეზა, შიფრინმა მედალი აიღო.
პირველი ცდის შემდეგ, 23 წლის ლინსბერგერმა ვლჰოვასთან 0.30-წამიანი უპირატესობა მოიპოვა. შიფრინმა პირველი ცდა ცუდად შეასრულა და საბოლოოდ, გამარჯვებულთან თითქმის ორი წამი წააგო. ვლჰოვას კარგი მეორე ცდა ჰქონდა, მაგრამ ავსტრიელის ჯობნა მაინც ვერ შეძლო. ლინსბერგერმა, ვისაც ორივე ცდაზე საუკეთესო დრო ჰქონდა, ავსტრიას ბოლო 10 მსოფლიო ჩემპიონატზე, სლალომში პირველი ოქრო მოუპოვა.
„ეს საოცარია, ეს წარმოუდგენელი მიღწევაა. არც ვიცი, რა ვთქვა. ყველაფერი გავიღე და ამისთვის ყოველდღიურად თავდაუზოგავად ვვარჯიშობდი. ყველაფერი უკან დამიბრუნდა. როცა რამე ძალიან გინდა, სამყარო შენთვის რაღაცას გაიღებს. მთელი გუნდის მდლიერი ვარ, რომელმაც ჩემთვის ამდენი რამ გააკეთა. ჩემთვის ძალიან ბევრი ადამიანი მუშაობს და ყველას გულითად მადლობას ვუხდი“, - განაცხადა ლინსბერგერმა.