მოსკოვის „ლოკომოტივის“ ყოფილი პრეზიდენტი ნიკოლაი ნაუმოვი გუნდიდან სოლომონ კვირკველიას გაშვებას უარყოფითად აფასებს. ნაუმოვის განცხადებით, ქართველი მაღალი დონის მცველია და ეს არამარტო რუსეთში, არამედ ჩემპიონთა ლიგაზეც დაამტკიცა.

„მიმაჩნია, რომ ეს ტრანსფერი ნაჩქარევია. სოლომონს შანსი სჭირდებოდა. დიახ, ტრავმის გამო გარკვეული დრო გამოტოვა, ალბათ გარკვეული თავდაჯერებულობა და მოტივაცია დაკარგა, მაგრამ არამგონია, რომ ფეხბურთის თამაში დავიწყდებოდა. სოლომონი ძლიერი მცველია, რომელიც გუნდს დაეხმარება. მეჩვენება, რომ კლუბმა იჩქარა.

დარწმუნებული ვარ, „როტორში“ ითამაშებს. მას უბრალოდ თამაში სჭირდება და არა სკამზე ჯდომა. ისევ და ისევ ვიმეორებ, შეუძებელია თამაში ერთ-ორ თვეში დაგავიწყდეს. მან თამაში რომ იცის, ეს უკვე ვნახეთ და ვიცით. საუბარი მაქვს არამხოლოდ რუსეთის პრემიერლიგაზე, არამედ ჩემპიონთა ლიგაზეც. ამიტომ, ვფიქრობ, რომ „როტორში“ სოლომონი დიდ როლს შეასრულებს და საკუთარ სიტყვას იტყვის“, - აღნიშნა ნაუმოვმა.

შეგახსენებთ, სოლომონ კვირკველია მოკოვის „ლოკომოტივში“ 2017 წლის იანვარში „რუბინიდან“ იჯარით გადავიდა, ხოლო 6 თვეში გამოისყიდეს. ხსენებულ პერიოდში მან „რკინიგზელთა“ მაისურით ჩატარებულ 109 მატჩში 4 გოლი გაიტანა, ერთხელ რუსეთის ჩემპიონი გახდა, ხოლო ორ-ორჯერ რუსეთის თასისა და სუპერთასის გამარჯვებული. ჩვენებური „როტორში“ ერთწლიანი იაჯრით გადავიდა.