ლონდონის მარათონის ორგანიზატორთა გადაწყვეტილებით, კორონავირუსის პანდემიის გამო, გარბენი წელს მასობრივი არ იქნება და მასში მხოლოდ ელიტარულ მორბენლებს დაუშვებენ. მათ შორის იქნებიან კენიელი ელიუდ კიპჩოგე და ეთიოპიელი კენენისა ბეკელე.

ტრადიციულად, ლონდონის მარათონი გაზაფხულზე (მარტში ან აპრილში) იმართება ხოლმე, მაგრამ პანდემიის გამო, 4 ოქტომბრისთვის გადმოიტანეს. უფრო მეტიც, 2021 წლის მარათონი 3 ოქტომბერს დაინიშნა.

ლონდონის მარათონში საშუალოდ, 40 000 მოყვარული მორბენალი მონაწილეობს ხოლმე. მათგან მიღებული შემოსავალი საქველმოქმედო მიზნებს ხმარდება. ქალაქის ცენტრალურ ქუჩებში, გარბენს ასობით ათასი ადამიანი ადევნებს თვალს.

პანდემიის გამო, უკვე გაუქმდა ისეთი ძველი და პოპულარული მარათონული გარბენები, როგორებიცაა ბოსტონის, ჩიკაგოს, ნიუ იორკის, ბერლინის მარათონები. ტოკიოში კი გარბენში მარტში, მხოლოდ ელიტარული მორბენლები მონაწილეობდნენ.

ლონდონის წლევანდელ მარათონს, მოყვარული მორბენლების გარდა, არც მაყურებლები დაესწრებიან. მონაწილეებს, სენ ჯეიმს პარკის ირგვლივ, 19.8 წრის გარბენა მოუწევთ. ორგანიზატორებს საპრიზო ფონდის შესახებ ინფორმაცია ჯერჯერობით არ გამოუქვეყნებიათ.

მოქმედ ჩემპიონის რანგში იასპარეზებს ელიუდ კიპჩოგე, ვინც მსოფლიოში პირველმა, კლასიკური დისტანცია (42.195 კმ) ორ საათზე ნაკლებში გაირბინა. ეს მან ავსტრიაში, ვენის არაოფიციალურ მარათონზე შეძლო. ლონდონის მარათონი მას ოთხჯერ აქვს მოგებული. მსოფლიოს ოფიციალური რეკორდიც - 2 საათი, 1 წუთი და 39 წამი, მასვე ეკუთვნის. ეს კენენისა ბეკელეს საუკეთესო დროს ორი წამით სჯობს.