ბუდუ ზივზივაძემ ახალი კლუბის, „მოლ ფეჰერვარის“ ვებგვერდთან ისაუბრა. ქართველი ფეხბურთელის აზრით, კარიერაში ნაბიჯი წინ გადადგა და იმედი აქვს, რომ უნგრეთის ჩემპიონი გახდება.

ქართველმა ფეხბურთელმა ასევე გაიხსენა კარიერის საწყისი ნაბიჯები, დანიაში გატარებული წარმატებული პერიოდი და საქართველოს შესახებ ისაუბრა.

- ბავშვობიდანვე გადაწყვეტილი გქონდათ პროფესიონალი ფეხბურთელობა?

- ასეა, შეიძლება ითქვას, რომ ბავშვობიდან ჩემი ოცნება იყო. ჩემს ოჯახში სპორტსმენი არავნ ყოფილა, მაგრამ მე სხვა ბავშვებთან ერთად ფეხბურთს ყოველდღე ვთამაშობდი. ერთი მეზობლის შემოთავაზებით საქმეს უფრო სერიოზულად მივუდექი.

- უნგრეთში საქართველოს ნაკლებად იცნობენ. რას იტყვით თქვენს ქვეყანაზე?

- საქართველო ლამაზი ქვეყანაა, ყოველგვარი მიკერძოების გარეშე. ყველას ვურჩევ, რომ ერთხელ ნახონ ეს ქვეყანა. ქართველი ხალხი ძალიან მეგობრული და სტუმართმოყვარეა. მრავალფეროვანი და გემრიელი კერძები გვაქვს, მთავარი კი ქართული ღვინოებია. უკვე ერთი წელია უნგრეთში ვცხოვრობ და ამ ორ ქვეყანას შორის ბევრი საერთოა. უნგრეთიც ძალიან ლამაზია და ღვინოებიც ძალიან ცნობილია. ხალხი მეგობრულია. შესაბამისად, ადაპტაციის დროს განსაკუთრებული პრობლემები არ შექმნია.

- უნგრეთამდე დანიაში იყავით...

- დიახ 23 წლის ასაკში გადავედი. მანამდე 5 წელი მქონდა პროფესიონალურ ფეხბურთში გატარებული. „დინამო თბილისის“ მეორე გუნდში. „ტორპედოსა“ და „სამტრედიაში“ ვთამაშობდი, სადაც ჩემპიონი და ბომბარდირი გავხდი. სამწუხაროდ დანიის პერიოდი ჩემს კარიერაში არც ისე წარმატებული გამოდგა. ამიტომ, საქართველოში დავბრუნდი, სადაც 2018 წელს კვლავ ბომბარდირის ტიტული მოვიგე.

- გასულ სეზონში უნგრეთში გოლები გაიტანეთ...

- ვფიქრობ, რომ კარიერაში წინ გადადგმული ნაბჯია. საბედნიეროდაქ ადაპტაცია უკეთ გავიარე, ვიდრე დანიაში. გოლები გავიტანე, მაგრამ მინდოდა უნგრეთის თასი მომეგო და საპრიზო სამეულში დაგვესრულებინა სეზონი.

- „ფეჰერვარში“ რა მიზნები გაქვთ?

- ძალიან ბედნიერი ვარ, რომ ასეთ ისტორიულ გუნდში ვითამაშებ. როგორც უკვე ვთქვი, საქართველოში ჩემპიონი და ორჯერ ბომბარდირი გავხდი. არ უარვყოფ, რომ იგივე მიზნები აქაც მაქვს. გოლების გატანა სასიამოვნოა, მაგრამ მთავარი გუნდური გამარჯვებაა. დარწმუნებული ვარ შემიძლია გუნდის წარმატებაში კარგი თამაშით, გოლებით და საგოლე პასებით ჩემი წვლილი შევიტანო. მინდა უნგრეთის ჩემპიონი გახვდე და თასიც მოვიგო.

- კლუბის გარდა, ამ ზაფხულს თქვენი ცხოვრებაც შეიცვალა...

- დიახ, ჩემი პატარა ქალიშვილი ივნისის დასაწყისში დაიბადა. მაგრამ ჯერ არ მინახავს, რადგან საქართველოში დაიბადა. თუმცა, მალე ჩემი მეუღლე მასთან ერთად ჩამოვა, მანამდე მინდა სახლი ვიპოვო, სადაც ერთად ვიცხოვრებთ.