„ლაციოს“ შემდეგ „ინტერიც“ – „ნერაძური“ სკუდეტოსთვის ბრძოლას ნელ-ნელა ეთიშება. ანტონიო კონტეს გუნდი ისედაც არასახარბიელო ვითარებაში იყო და XXX ტურის მერე კიდევ უფრო გაიუარესა ყველაფერი.

„ინტერი“ „ბოლონიას“ უგებდა, მერე რიცხობრივი უპირატესობა მიიღო, პენალტით სხვაობის გაზრდის შანსი გაანიავა და ბოლოს წააგო. ანტონიო კონტე თამაშის შემდეგ ფეხბურთელებს განცალკევებით ესაუბრა, რომლის დეტალები ჯერ უცნობია, ტკბილი დიალოგი რომ არ იქნებოდა, ფაქტია. „იუვენტუსთან“ ჩამორჩენა უკვე მთელი 11 ქულა, რაც ცხადია ძალიან დიდი სხვაობაა და სკუდეტოზე ფიქრი კი არა, ახლა „ინტერის“ მთავარი საზრუნავი მესამე ადგილის შენარჩუნება უნდა იყოს. რატომ? იმიტომ, რომ „ატალანტამ“ ზედიზედ მერვე თამაში მოიგო. ამჯერად, სარდინიაზე, „კალიარისთან“ და მესამე ადგილს კინკილა ქულა აშორებს.

30-ე ტურმა ისიც გამოაჩინა, რომ „რომა“ საშინელ ფორმაშია. ზოგადად, „მგლების“ შიდა სამზარეულოში არაა კარგი სიტუაცია და ეს როგორც ჩანს, ფეხბურთელებზეც მოქმედებს. ამის გარეშეც, „ნაპოლისთან“ მარცხი დიდად გასაკვირი არაა. 'რომასთვის" ერთადერთი დადებითი ის მოხდა, რომ 175-დღიანი იძულებითი პაუზის შემდეგ მოედანზე დაბრუნდა ნიკოლო ძანიოლო... ჯენარო გატუზოს გუნდს ზემოხსენებული „ატალანტას“ გადამკიდე ჩემპიონთა ლიგის ზონაში მოხვედრის იმედი არ უნდა ჰქონდეს, მაგრამ მეხუთე ადგილისთვის იბრძვის, ესეც ერთგვარი პრესტიჟია არასტაბილური სეზონის ჟამს.

„ინტერი“ – „ბოლონია“ 1:2 (1:0)

გოლები: 1:0 ლუკაკუ (22), 1:1 მუსა იუვარა (74), 1:2 ბაროუ (80)

„ბრეშა“ – „ვერონა“ 2:0 (0:0)

გოლები: 1:0 პაპეტი (52), 2:0 დონარუმა (90)

„კალიარი“ – „ატალანტა“ 0:1 (0:1)

გოლები: 0:1 მურიელი (27, პენ)

„პარმა“ – „ფიორენტინა“ 1:2 (0:2)

გოლები: 0:1 პულგარი (19, პენ), 0:2 პულგარი (31, პენ), 1:2 კუცკა (49, პენ)

„სამპდორია“ – „სპალი“ 3:0 (3:0)

გოლები: 1:0 ლინეტი (12), 2:0 გაბიადინი (45), 3:0 ლინეტი (45)

„უდინეზე“ – „ჯენოა“ 2:2 (1:0)

გოლები: 1:0 ფოფანა (44), 2:0 ლაზანია (73), 2:1 პანდევი (81), 2:2 პინამონტი (90)

„ნაპოლი“ – „რომა“ 2:1 (0:0)

გოლები: 1:0 კალეხონი (55), 1:1 მხითარიანი (60), 2:1 ინსინიე (82)