საწყლოსნო სახეობათა საერთაშორისო ფედერაციამ (FINA) ერთი წლით გადავადებული (25 მ) 2020 წლის ე.წ. მოკლე წყლის მსოფლიოს ჩემპიონატის ახალი თარიღები გამოაცხადა.
თავდაპირველად შედგენილი კალენდრით, მსოფლიოს ჩემპიონატისთვის წლეულს 15-20 დეკემბერს უნდა ემასპინძლა დუბაის, ახალი თარიღით კი ჩემპიონატი 2021 წლის 13-18 დეკემბერს ჩატარდება. FINA-ს განმარტებით, ჩემპიონატის კალენდარში შესაბამისი ცვლილებების მიზეზი კორონავირუსის პანდემიაა.
მოკლე წყლის მსოფლიოს ჩემპიონატები 25-მეტრიან აუზში ეწყობა და ძირითადად 200 მეტრ და ნაკლებ მანძილებზე ასპარეზობებს ითვალისწინებს.
FINA-მ მაისის დასაწყისში ფუკუოკას (იაპონია) საწყოლოსნო სახეობათა მსოფლიოს ჩემპიონატის ახალი ვადებიც განსაზღვრა. თავდაპირველი გეგმით, ჩემპიონატი უნდა ჩატარებულიყო 2021 წლის 16 ივლისიდან 1 აგვისტოს ჩათვლით, მაგრამ მას შემდეგ, რაც საერთაშორისო ოლიმპიურმა კომიტეტმა კორონავირუსის პანდემიის გამო ტოკიოს ოლიმპიური თამაშები 2021 წლამდე გადაავადა (23 ივლისი - 8 აგვისტო), ადრე დათქმულ დროს მსოფლიოს პირველობის ჩატარება შეუძლებელი გახდა. შედეგად, მსოფლიოს ჩემპიონატის ჩატარება გადაწყდა 2022 წლის 13-29 მაისს.
GEONOC.ORG.GE