ესპანეთის საკალათბურთო ჩემპიონატი შესაძლოა 31 მაისს განახლდეს. ლიგა ენდესას წარმომადგენლებმა ჩემპიონატის დასრულების ახალი გეგმა შეიმუშავეს და აღნიშნული გადაწყვეტილება 18-ივე გუნდისთვის მისაღები გახდა.

ახალი ფორმატი შემდეგნაირად ჩატარდება: გუნდები ერთ წრედ ითამაშებენ, 5 ტურის შემდეგ კი მათ შორის საუკეთესოები გამოირჩევიან. პირველ-მეოთხე ადგილზე გასული გუნდები ნახევარფინალში შეხვდებიან, იქ გამარჯვებულები კი ერთმანეთს ჩემპიონობისთვის დაუპირისპირდებიან.

აღსანიშნავია ის ფაქტი, რომ ტურნირი დიდი ალბათობით კანარის კუნძულებზე ჩატარდება, სადაც კორონავირუსით ინფიცირების ყველაზე მცირე ფაქტი ფიქსირდება. ასევე განიხილება ანდორაც.

A ჯგუფში: „ბარსელონა“, „იბეროსტარ ტენერიფე“, „ბილბაო“, „ბასკონია“, „უნიკახა“ და „ჟუვენტუტ ბადალონა“ იქნებიან.

B ჯგუფში: „რეალი“, „სარაგოსა“, „მორაბანკ ანდორა“, „ვალენსია“, „სან პაბლო ბურგოსი“ და „გრან კანარია“ ითამაშებენ.

A ჯგუფის პირველადგილოსანი კი ნახევარფინალში B ჯგუფის მეორეადგილოსანს შეხვდება და პირიქით B ჯგუფის პირველადგილოსანი A ჯგუფის მეორეადგილოსანს დაუპირისპირდება და ფინალისტები გამოვლინდებიან.

შეგახსენებთ, რომ აღნიშნულ ტურნირში საქართველოს საკალათბურთო ნაკრების 5 მოთამაშე გამოვა.

A ჯგუფში თორნიკე შენგელიასა და მეტ ჯენინგის „ბასკონია“ და გიორგი შერმადინის „იბეროსტარ ტენერიფე“ არიან. B ჯგუფში კი ტად მაკფადენის „ბურგოსი“ და ბექა ბურჯანაძის „გრან კანარია“.

აქვე გეტყვით, რომ თუ ტურნირის დასრულება 10 ივლისამდე ვერ მოხერხდა, ის ჩაშლილად გამოცხადდება. აღსანიშნავია ისიც, რომ წელს ქვედა ლიგაში კი არცერთი გუნდი არ დაქვეითდება.