მადრიდის „რეალისა“ და ბრაზილიის ნაკრების ლეგენდამ რობერტო კარლოსმა 1998 წლის ჩემპიონთა ლიგის ფინალი გაიხსენა. მაშინ „სამეფო კლუბმა“ „იუვენტუსი“ ამსტერდამში პრედრაგ მიატოვიჩის გოლით დაამარცხა და 32-წლიანი პაუზის შემდეგ დაეუფლა ამ ტიტულს.

წყვილში ფაორიტად „იუვენტუსი“ მიიჩნეოდა, მატჩისწინა ღამეს კი კარლოსის განცხადებით, ფეხბურთელებმა დაძინება ვერ მოახერხეს.

„იუვენტუსი“ ფინალში ზედიზედ მესამე გავიდა და ჩვენ იმ თამაშში ფავორიტები არ ვიყავით. ფინალის წინა ღამეს ვერცერთმა ჩვენგანმა ვერ დაიძინა. დასაძინებლად 10 საათზე წავედით, მაგრამ დილის ოთხ საათზე ყველანი სასტუმრო ჰოლში ვიყავით და ერთმანეთს ისტორიებს ვუყვებოდით. თუმცა, „იუვენტუსის“ შიში არ გვქონდა, უბრალოდ მისი დიდი პატივისცემა გვქონდა.

თამაში ჩვენი ხარისხით არ მოგვიგია, არამედ მოტივაციით. არასდროს დამავიწყდება ის ღამე, პირდაპირ სიბელესის მოედანზე წავედით, ქუჩაში ათასობით ადამიანი იყო. თუ მთხოვთ „რეალში“ გატარებული პერიოდიდან საუკეთესო მომენტის დასახელებას, სწორედ ეს ტრიუმფია.

გალაქტიკო „რეალი“? გასახდელში შედიოდი და შენს გარშემო "ოქროს ბურთის" მფლობელს, ლა ლიგის საუკეთესო ფეხბურთელს, „პიჩიჩის“ მფლობელს (ლა ლიგის ბომბარდირი), მსოფლიოს საუკეთესო მეკარეს და მსოფლიო ჩემპიონს ხედავდი“, - თქვა რობერტო კარლოსმა.

შეგახსენებთ, რომ რობერტო კარლოსი „რეალში“ 1996-2007 წლებში თამაშობდა და ჩემპიონთა ლიგა სამჯერ მოიგო. თუმცა, როგორც თავად აღნიშნა, პირველი, 1998 წელს მოგებული ტიტული ყველაზე კარგად აგონდება.