ბილბაოს „ატლეტიკის“ ფეხბურთელი ინიგო მარტინესი ესპანეთის თასის ფინალში უმაყურებლოდ თამაშის წინააღმდეგია. ესპანელი ფეხბურთელის განცხადებით, ბასკური დერბის („ბილბაო“ ფინალში „სოსიედადს“ უნდა შეხვდეს) ცარიელი ტრიბუნების ფონზე ჩატარება წარმოუდგენელია.
„უმაყურებლოდ თამაშს ჩვენ არ დავთანმდებით, როგორც ფეხბურთელები, ისე ხელმძღვანელობა. არ შეიძლება ფინალი ჩვენი ქომაგების გარეშე ვითამაშოთ. ეს უცნაური იქნება და ამის შესახებ ფიქრიც არ გვინდა. იმედია, ჩვენი ცხოვრების ამ ისტორიულ მომენტში ყველაფერი მალე შეიცვლება, რადგან ჩვენი, ისევე, როგორც მოწინააღმდეგე პუბლიკის წინაშე თამაში შესანიშნავი იქნება. ბასკური ფინალი უმაყურებლოდ წარმოუდგენელია“, - თქვა ინიგომ.
შეგახსენებთ, ესპანეთის თასის ფინალი, სევილიაში, „ესტადიო ლა კარტუხაზე“ უნდა გაიმართოს, თუმცა პანდემიის პირობებში მატჩის ჩატარების თარიღი უცნობია. აქვე გეტყვით, რომ ინიგო მარტინესი "ბილბაოში" 2018 წლიდან თამაშობს, მანამდე კი 7 სეზონი სწორედ "სოსიედადში" აქვს გატარებული.
