ამერიკის შეერთებული შტატების ჩოგბურთის (USTA) ასოციაცია ამერიკის ღია ჩემპიონატის გადადებას არ აპირებს, მიუხედავად იმისა, რომ საფრანგეთია ღია ჩემპიონატი სექტემბერში დაიწყება. აღნიშნულის გადაწყვეტილება ასოციაციამ ტვიტერის გვერდის მეშვეობით გაავრცელა. ასევე, USTA არ გამორიცხავს, სიტუაციის გამწვავების შემთხვევაში ტურნირის დაწყების დრო გადაწიოს.
USTA-მ საფრანგეთის ჩოგბურთის ფედერაციაც გააკრიტიკა და აღნიშნა, რომ ტურნირის გადადების შესახებ გადაწყვეტილება ერთპიროვნულად არ უნდა მიღებულიყო.
"იმ დროს როდესაც მსოფლიო ერთ მუშტად იკვრება, ჩვენ მივიჩნევთ, რომ ასეთი გადაწყვეტილება ერთპიროვნულად არ უნდა მიღებულიყო. აქედან გამომდინარე, USTA გადაწყვეტილებას მიიღებს სხვა დიდი სლემის ტურნირებთან, WTA-ს, ATP-ის, ITF-ს და ჩვენ პარტნიორებთან, მათ შორის, ლეივერის თასის ორგანიზატორებთან კონსულტაციების შემდეგ." - ნათქვამია განცხადებაში.
US Open-ი 31 აგვისტოს უნდა დაიწყოს და ორი კვირის განმავლობაში გაგრძელდება, ხოლო საფრანგეთის ღია ჩემპიონატი სტარტს 20 სექტემბერს აიღებს, ამერიკის ღია ჩემპიონატის დასრულებიდან ერთი კვირის შემდეგ. ასევე, საგულისხმოა ის ფაქტიც, რომ როლან გაროსის ტურნირის დროს ევროპასა და აზიაში ხუთი ტურნირი უნდა გაიმართოს, ხოლო ბოსტონში 25 სექტემბერს ლეივერის თასის გათამაშება უნდა დაიწყოს, რომლის გადადებას ჯერჯერობით USTA არ აპირებს.
ჩოგბურთის სეზონი ოფიციალურად ივნისამდე შეჩერდა, აღნიშნულის გამო გრუნტის საფარზე ტურნირები აღარ ჩატარდება და ერთადერთი გამონაკლისი რონალ გაროსი იქნება, რომელიც უკვე ვახსენეთ. ჯერჯერობით ცვლილებებს არ აპირებენ უიმბლდონთან დაკავშირებით. ახალი გეგმის მიხედვით სეზონი ბალახის საფარზე განახლდება. უიმბლდონის აღმასრულებელი დირექტორის რიჩარდ ლევისის განცხადებით ჯერჯერობით ტურნირის გადავადება არ იგეგმება, თუმცა სიტუაციის გამწვავების შემთხვევაში ფართო საზოგადოების ინტერესს პასუხისმგებლობით მოეკიდებიან.
