ფორმულა 1-ის, საერთაშორისო საავტომობილო ფედერაციის (FIA), ავსტრალიის დიდი პრიზის ორგანიზატორების და მრბოლთა ასოციაციის გადაწყვეტილებით, ფორმულა 1-ის 2020 წლის სეზონის პირველი ეტაპი - ავსტრალიის დიიდ პრიზი გაუქმდა. მიზეზი რა თქმა უნდა, ახალი კორონავირუსია.

ეს გადაწყვეტილება პარასკევ დილით მიიღეს მას შემდეგ, რაც „მაკლარენმა“, თავისი თანამშრომლის ვირუსით დაავადების გამო, მელბურნში ასპარეზობაზე უარი თქვა. FIA-მ, ავსტრალიის რბოლის ორგანიზატორებმა და ფ1-ის ხელმძღვანელობამ, ეს გადაწყვეტილება გუნდებთან თათბირის შემდეგ მიიღეს.

„ჩვენ გვესმის, რომ ათასობით ფანს ეს გადაწყვეტილება გულს დასწყვეტს. ბილეთების ყველა მფლობელს, გადახდილი თანხა აუნაზღაურდება“, - ნათქვამია ერთობლივ განცხადებაში.

P.S. კორონავირუსის პანდემიის გამო, ფორმულა 1-ის ხელმძღვანელობამ, ბაჰრეინის და ვიეტნამის დიდი პრიზების გადადების გადაწყვეტილებაც მიიღო. ამასთან, ჯერ უცნობია, ეს რბოლები მოგვიანებით გაიმართება, თუ გაუქმდება. ამგვარად, კალენდარმა სეზონის პირველი ოთხი რბოლა (მეოთხე ჩინეთის დიდი პრიზია) დაკარგა, რაც იმას ნიშნავს, რომ სეზონის პირველ ეტაპად, ჯერჯერობით ჰოლანდიის დიდი პრიზი რჩება. ის 1-3 მაისს არის დანიშნული.