საქართველოს ძალოსანთა ნაკრები ბელარუსის ქალაქ გროდნოში გამართულ ოლიმპიური თამაშების სალიცენზიო საერთაშორისო ტურნირზე (Alexander cup 2019) 2 სპორტსმენით გაემგზავრა, მაგრამ ფიცარნაგზე მხოლოდ ევროპის ჩემპიონი შოთა მიშველიძე გავიდა. რაც შეეხება ოლიმპიურ ჩემპიონს ლაშა ტალახაძეს, ის განაცხადში კი იყო, მაგრამ მცირე ტრავმის გამო შეჯიბრებაში არ ჩაბმულა.

ორგზის ოლიმპიური ჩემპიონის ალექსანდრ კურლოვიჩის ხსოვნისადმი მიძღვნილ ტურნირში 18 ქვეყნის 60-ზე მეტი ძალოსანი მონაწილეობდა. 61 კგ წონაში მოასპარეზე მიშველიძემ ატაცში (123 კგ), აკვრაში (143 კგ) და ორჭიდის ჯამში (266 კგ) ოქროს მედლები მოიპოვა და სალიცენზიო ქულებიც გამოიმუშავა.

ძალოსნობის საერთაშორის ფედერაციის (IWF) წესებით, ოლიმპიურ თამაშებამდე ძალოსანმა ევროპის და მსოფლიო ჩემპიონატებზე ორ-ორჯერ უნდა იასპარეზოს, ორჯერ კი - სალიცენზიო ტურნირზე. ლაშა ტალახაძემ ევროპისა და მსოფლიოს ჩემპიონატები ზედიზედ მოიგო და მძიმე წონაში უპირობო ლიდერია, შესაბამისად, ტოკიოს საგზური ფაქტობრივად განაღდებული აქვს. მიშველიძის შემთხვევაში სხვა ვითარებაა, ამიტომ ქულების დანაკლისი სალიცენზიო ტურნირებზე უნდა შეავსოს.

საქართველოს ნაკრები საოლიმპიადო სალიცენზიო ტურნირზე 14-17 ნოემბერს თურქეთის გაზიანთეფშიც წარსდგება, მაგრამ კონკრეტულად რომელი სპორტსმენებით, მწვრთნელებს ეს ჯერ არ გადაუწყვიტავთ.

geonoc.org.ge